MPCC in Kuhva-a harsatna chinfel phutin ZPM in tharchhuah dehralna ngaihtuah an phut

Mizoram Pradesh Congress Committee  (MPCC) chuan Kuhva chungchanga Mizoram harsatna tawhte a rang thei ang bera chingfel tura Mizoram sawrkar an phut thu sawiin, ZPM pawhin MNF sawrkar chu kuthnathawktute tharchhuah dehralna ngaihtuah sak turin an ngen bawk.

Nimin-a thuchhuah an siamah MPCC Media Department chuan Mizoram khawthlang lama Kuhva chingtuten Kuhva tawlhruk a tam avang ni a ngaih theiha an Kuhva thar an hralh thei lo leh chumi avanga harsatna hrang hrang a thleng chho ta te, Mizo leh Mizo inkara inepna hial a thleng ta chu pawi an ti takzet tih an tarlang a. Heng zawng zawng hi Mizoram sawrkar chak loh vangte, ram hruaitu lu thenkhat te leh Kuhva tawlhrukna a inhnamhnawih, Assam sawrkar wanted-te nen meuh pawha inzawmna tha tak an neihin a hrinchhuah a ni tih Mizoram mipuite hian kan hriat a ngai tih tarlangin, “Ram pawn atanga Kuhva rah lakluh leh phurh kual hi dan anga kalpui theih reng a ni a. Dan hnuai kalpui a nih theih nan sawrkarin a duh chuan hma pawh a la thei reng a ni,” tiin hetiang lama hmalakna awm lo leh harsatna thleng pawh chinfel tuma hmalakna awm chuang si lo chu an hrethiam thei lo tih an sawi a ni.

Hetihlai hian nimin-a ZPM Political Affairs Committee thukhawm chuan MNF sawrkar chu kuthnathawktute tharchhuah dehralna ngaihtuah sak turin an ngen a. Mizoram chhunga kuthnathawktute tharchhuah dehralna kawngah hun rei tak atangin harsatna kan tawk nasa hle tih sawiin, “Hei hi ZPM Party chuan kan ngai pawimawhin kuthnathawktute tan theihtawp chhuaha an harsatna sutkian a nih theih nan hmalak zel tha kan ti a. Kan thlai thar hralhna kawnga harsatna tawh mekte a rang lama sukiang tur leh hmala thuai turin Mizoram sawrkar kan phut,” an ti a. Assam sawrkarin harsatna a siam thin sutkianna tur zawnga State pahnihte inbiakna kal lai mek hmachhawp a awm chungin, inbiaknaa tel tur Revenue Minister leh Law & Judicial Minister te ram danga an zin khawthawn avanga inbiak hun sawn rawt a ni chuan kutthnathawktute harsatna te Mizoram sawrkarin a ngaihpawimawh tawk loh zia a tilang chiangah an ngaih thu an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man