KMMTTP hnathawh kallai chawlhtir leh mek a ni

Kumin December a zawh theih beisei, Lawngtlai atanga Myanmar pawh tura Motor kawngpui sial mek, Kaladan Multi Modal Transit Transport Project (KMMTTP) in an ram a tihchhiat sak (Land Owners), zangnadawmna la dawng lo nia insawi ten October ni 21, 2022 atang khan kawng laih hna thawh mektu Contractor te chu an chawlh tir.

Thudawn danin, KMMTTP kawng siamtu Contractor te chuan hetianga hna chawlhtir an nih avang hian tun thlengin an hna an la chawlhsan a. KMMTTP kawng sial mek Mizoram chin chu kumin December thla a zawh hman beisei a nih laiin, hnathawk thei lo a an awm rei chuan an zawh hman loh a hlauhawm thei dawn nia thudawn a ni. Zangnadawmna dawn beisei Land Owners' mi 138 vel te chuan cheng vbc. 60 vel zangnadawmna dawn tur an la nei niin an sawi.

Hetihlai hian National Green Tribunal (NGT), Eastern Zone Bench, Kolkata chuan September 26, 2022 khan Kaladan Multi Modal Transit Transport Project (KMMTTP) kawng siam leh a kaihhnawih thilte chawlhsan tura hriattirna a tichhuak a. Hei erawh thla khat chhung insawifiahna hun pe turin NGT ngen a ni a, hemi vang hian NGT in Stay Order a tihchhuah chu Vawiin thlengin hman a la ni lo.

Cheng vbc. 1011.52 senna tur KMMTTP hi sawrkar laipui Ministry of Road Transport and Highways (MoRTH) hnuaia SARDP (NE) (A) Scheme hnuaia kalpui niin, kawngpui sial hna hi kum 2010 ah tan a ni a, Mizoram chhunga kawngpui kal tur chu km 87.18-a thui niin Package 3-ah then a ni a. Package-I chu km 0-34.59 niin RDS Project Ltd. Company-in an contract a. Package-II chu km 34.59-60.37 niin Atlanta-ARSS (JV) Orissa te’n an thawk thung. Package-III km 60.37-87.18 chu RDS Project Ltd bawkin an thawk a ni.