Indo-Bangla Trade Centre peihfel thuai tul ti

Mizoram Rajya Sabha MP K. Vanlalvena chuan Kawrpuichhuah hmuna Indo-Bangla Trade Centre peihfel thuai thuai chu Mizoram economy atana a pawimawh thu a sawi.

Parliamentary Standing Committee on Commerce chuan niminpiah tlai khan an Chairman Dr. Abhishek Manu Singhvi hovin Parliament House Committee Room-ah thutkhawm an nei a, he hunah hian Committee Member atan ruat thar Rajya Sabha MP K. Vanlalvena pawh hi telin he hunah hian thupui pahnih - Foreign Trade leh State Trading chungchangte sawiho a ni a. Rajya Sabha MP chuan Mizoram in India ram pawna thawnchhuah tur Sector hrang hrangah a neih thu leh a bik takin Agriculture, Horticulture, Forest, Sericulture leh Cane and Bamboo product bakah Handloom and Handicraft product thahnem tham tak a neih thu a sawichhuak a. Thenawm ram Bangladesh leh Mizoram inkalpawhna kum 75 lai khar sak kan nih tawh avanga sumdawnna in a tawrhna te bakah Myanmar ram buaina avanga sumdawnna lama harsatna Mizoram in a tawh thu te sawi langin, Mizoram khawthlang lam ramri a awm, Kawrpuichhuah hmuna Indo-Bangla Trade Centre peihfel thuai thuai chu Mizoram economy atana a pawimawh thu te a sawi a ni.

Mizoram Rajya Sabha MP chuan tunhnaiah UAE Embassy ah a kal thu leh Mizoram thlai thar chi hrang hrangte UAE ah thawnchhuah dan tur UAE Ambassador a sawipui thu he hunah hian a sawi bawk a. Mizoram atanga Arabia ramah te bungrua kan thawnchhuah theih nan bungraw phur Rêl Service regular tak leh bungraw phur Thlawhna Service Mizoram in kan mamawh thute a thlen bawk a ni.