Lunglei DC hovin kawng dinhmun sawiho a ni

Nimin khan Aizawl-Thenzawl-Lunglei (ATL) World Bank kawng 100Km-160Km (Kanghmun–Lunglei) kawng dinhmun chungchang chu Lunglei District Bawrhsap hovin sawrkar aiawhte leh NGO bakah kawng siam hna thawktu ten an sawiho.

He kawng chungchangah hian September 26, 2022 khan thutkhawm neih ni tawhin Bhavya Construction-te chuan October thla ralhma ngeia repair hna thawh zawh an lo in tiam tawh a. Hna hi la thawh zawh loh niin kawng dinhmun pawh ala chhiat em avangin he thutkhawm hi neih leh a ni a. He hunah hian Lunglei DC Kulothungan A chuan Bhavya Construction te hnathawh leh an hmalakna te a that tawkloh thu sawiin, kawng repair hna chu zawhfel thuai anih theihnan chak taka hma la turin a hriattir a. Hnathawh kal mek chu uluk taka enfiah tur leh a tul anga na taka nawr turin PWD hotute pawh a ngen nghal bawk a ni.