Online hmanga Learner’s Licence dilna hawngin Offline hmanga dilna tihtawp nghal a ni

Online hmanga Learner’s Licence dilna tur, Faceless Application for Learner’s Licence chu nimin khan hman theih tura hawn niin DTO Office hrang hranga Offline-a Learner Licence dil thin chu tihtawp nghal a ni.

Mipuite hman theih tura Faceless Application for Learner’s Licence hawnna inkhawm hi nimin khan Transport Directorate Conference Hall-ah neih niin Commissioner & Secretary, Transport KT. Beicho IRAS chuan a hawng a, sawrkar laipuiin Information Technology bakah Artificial Intelligence a ngaih pawimawh thu sawiin, Transport Department chuan National Informatics Centre (NIC) nena thawhhona tha tak nei zelin mipuite awlsamna tur zawk chhawpchhuah zel an tum thu leh Faceless Application for Learner’s Licence chuan mipuite sum leh hun tam tak a hum tur chu lawmawm a tih thu a sawi a. Transport Director Er. R. Lalrammawia chuan IT hmasawnna chuan awlsamna tam tak a thlen thu a sawi a. Ram a than ang zela hna tam zel karah pawh IT thiamna chuan mipuite mamawh pe thei tura puitu a nih thu a sawi a ni.

Hawnna hunah hian National Informatics Centre aiawha report petu Lalmuanpuii chuan Faceless Learner’s Licence hi mipuiten Office-a kal ngai lova Inlum atanga awlsam taka engtik lai pawhin, khawi hmun atang pawhin Learner’s Licence lak theih tura buatsaih a nih thu a sawi a. Mipuite harsatna hriain Transport Department-in hun rei tak atang khan hmalak a lo tawh thu leh Faceless Learner’s License bakah hian Service dang 58 - Vehicle Related Service leh License Related Service-ah Office kal ngai lova an dawr theihna turin hmalak mek a nih thu a tarlang bawk.

Learner’s Licence dil tur hian Sarathi Portal sarathi.parivahan.gov.in/sarathiservice emaw, Transport Department website transport.mizoram.gov.in-ah kalin - Apply for Learner Licence-ah luh tur a ni. Aadhar based authentication (e-KYC) leh Aadhar tel lovin dil theih a ni ang. Aadhar based authentication-ah hian One Time Password (OTP) angaih avangin kan Aadhar-a Mobile Number leh kan Mobile number hman lai mek a inmil angai dawn a ni. Aadhar tel lova dilna erawh kum leh nihna tihchianna document dang online application-ah dah telin, heng document te hi DTO in a dik ngei a ni tih a enfiah angai dawn thung a. Counselling leh exam te hi online hmangin Mizo tawng ngei a tih theih a ni.