Grape Wine-a alcohol tel zat tur bithliah

Mizoram (Liquor Prohibition) Act, 2019 (MLP Act) hnuaiah Grape Wine Rules peihfel a ni tawh a, Mizoram chhunga Grape Wine siamchhuah te chu Alcohol za zel a 10 (10%) chin awm a phalsak dawn. Hetihlai hian Excise Duty (chhiah) lak zat tur pawh tihfel ni tawhin, litre khatah Rs 10 zel lak a ni ang.

Mizoram sawrkarin kar kalta Zirtawpni, November 4-a hriattirna a tihchhuah a tarlan a nih danin, Mizoram Liquor (Prohibition) Rules, 2022 tlawhchhanin, Mizoram sawrkar chuan Mizoram chhunga Grape Wine siamchhuahte chu Alcohol za zela 10 chin awm a phalsak a. Hei hi za zela 2 aia tam emaw, tlem zawk emaw thleng phalsak a ni. Hetihlai hian dan thar hman hma a Grape Wine siamchhuah-ah alcohol 11% a awm thin nia thudawn a ni.

END-in October 6, 2022-a notification an tihchhuahah, Military leh Para-Military ten Zu an lakluh atanga chhiah lak zat tur pawh tarlan tel a ni a, Zu litre khatah Rs. 60, Wine litre khatah Rs. 40 leh Beer litre khatah Rs. 10 lak a ni ang.

August 31, 2022-a Chief Minister Zoramthanga hova thukhawm Council of Minister chuan, Excise & Narcotics Department (END) atanga lut, The Mizoram Liquor (Prohibition) Draft Rules chu ngaihtuahin an sawiho hnuah an pawm a. END chuan Rules chu hman tan theih turin September 7, 2022 khan Notification a chhuah leh a ni.