Fisheries Minister hovin Sialsuk YMA Tuikhuah-ah Nghakuai Chiah Runpui neih a ni

Sialsuk Joint YMA in Sialsuk YMA Tuikhuah-a Nghakuai Chiah Runpui an buatsaih chu nimin khan Fisheries Minister K. Lalrinliana chuan hawngin Vawiin thlengin Nghakuai hmanga Sangha man theihna hun hawn a ni.

Nghakuai Chiah Runpui hawnna inkhawm Sialsuk YMA Tuikhuah Chawlhbuk-a buatsaihah Minister K. Lalrinliana chuan luidung-a eizawngtute leh Sangha vulhtuten hlawk zawka Sangha an man leh Zoram mipuiten luidung nungcha hnianghnar taka kan hmuh theihnan sawrkarin hma a la thin tih sawiin, Sialsuk Joint YMA ten Sangha humhalh leh vulh punga hetiang ruahmanna an siam hi a lawmawm takzet tih a sawi a, hei hian sawrkar Dan bawhchhe si lo leh sawrkar phal loh hmanrua tel lova hlawk leh hlimawm taka Sangha leh luidung nungcha a man theih a ni tih a lantir bakah mipuite min zirtirtu mi ngei se a duh thu a sawi a. Luidung nungcha te Pathian in kan ei atana a ruat rualin kan intodelh theih nan Sangha note la ei tham lohte hi kan zuah hram hram a pawimawh thu a sawi bawk.

He hunah hian Bialtu MLA leh Horticulture Development Board Vice Chairman Prof. F. Lalnunmawia pawhin Nghakuai Chiah Runpui buatsaih a ni chu lawmawm a tih thu a sawi a, anni bakah hian Health & Family Welfare Board Vice Chairman Dr. ZR. Thiamsanga MLA leh Fisheries Department hotute pawhin he hun hi an hmanpui a ni.

Nghakuai Chiah Runpui hi November ni 8 leh 9, 2022 chhunga neih tur a ni a, chawhma dar 10:30 atanga tlai dar 4:00 thleng Chiah theih niin Sialsuk YMA Tuikhuah-a Sanghate hi kum 2 chhung khawih loh an ni a, Nghakuai chiah tum an tam avangin Online-a in register a theih tawh lova, a hmuna kal a in register chawp ngai tawh dawn a, Registration Fee hi Rs. 100/- a nih bakah Nghakuai chiah man hi darkar chanve atan Rs. 50/- zel a ni a, duh chen chen chiah theih niin darkar chanve tinah Rs 50/- chawi belh zel tur a ni. Nghakuai-a Sangha mantuten an Sangha man hi an nei nghal zel dawn a, a hmuna ei nghal duh tan ruahmanna siam niin, hawn duh tan pawh vur chhawp a ni bawk. Nghakuai hi mahni ta hman theih niin a duh tan a hmunah Mau a siam nghakuai a lei theih a, a chah atan mahni neih ang leh duh ang ang hman phal a ni.