Kan harsatna kawng engkim a min chhawmdawltu YMA kan nei hi a vanneihthlak - Health Minister

Health Minister Dr. R. Lalthangliana chuan Mizo mipuite huapzo pawl ropui tak, kan harsatna kawng engkim a min chhawmdawltu YMA kan nei chu a vanneihthlak hle tih sawiin, “Kum 2 chuang zet Covid-in min tihbuai lai khan YMA hi kan thahrui ber an ni,” a ti.

Nimin-a Luangmual Branch YMA Platinum Jubilee lawmna Luangmual YMA Hall-a neih a hmanpuina ah he thu hi sawiin Health Minister Dr. R. Lalthangliana chuan YMA chu kum 1935-a din a ni tih sawiin, “YMA chuan Zofa zawng zawngte min huap a. Kum 2 chuang zet Covid-in min tihbuai lai khan YMA hi kan thahrui ber an ni. YMA chu mi zawng zawng min khaikhawmtu, hnamdang neih ve loh an ni,” tiin, “YMA thuvawn pakhat Tlawmngaihna hlutzia hi kan lei li hian a sawi chhuak zo lo a ni,” a ti a. YMA chu fan tawp nei lova mite tanpui thintu a nih avangin a hlu takzet ti pawh sawiin, hetihrual hian hmasawnna thar kawngzawh zel tur kan la nei tih a sawi a. “Kan rilru chhungril tak taka awm hi a taka parchhuah tir a ngai a, YMA-te hian kan ram chhiat leh thatah mawh kan phur a ni. Central service-ah kan tling thei ta manglo hi YMA ang pawha ngaihtuahna kan sen a ngai a, Super Specialist Doctor hrang hrang pawh lak tur kan nei lo a, tan kan lak nasat a ngai hle a. Khawvel hi chhoh en lo ang u. Kum zabi 21-na hi Zofate tan chona nasa tak ni se la, khawvel hi chhuk zawnga kan en thei lo anih pawhin chho zawng ni lo, a phei zawng talin i en hram hram ang u,” tiin Zofate chu India ram ah leh khawvel a langsar taka kan in phochhuah a pawimawh a tih thu a sawi bawk.

Nimin-a he hun hmanna ah hian Health Minister Dr. R. Lalthangliana hian Platinum Jubilee puala Souvenir buatsaih chu a tlangzarh nghal bawk a, he hun hi Central YMA President R. Lalngheta pawhin khual zahawm niin a hmanpui bawk a ni.

Report a tarlan a nih danin Luangmual Branch YMA hi pawl anga Civil Hospital Aizawl a thisen pe hmasa ber niin kum 1994 Sept. ni 22, 23 leh 24 khan Civil Hospital Aizawl tan thisen pein, Unit 33 pein pawl anga thisen pek kawngah hian hmahruaitu te zinga mi an ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man