Hmawngbuchhuah ah inrukbona a thleng

Tunkar Thawhtanni tlailam dar 6:00 bawr vel khan Lawngtlai District chhung, Hmawngbuchhuah khua ah mi pathum, hmaituam-a Silai keng lutin mipa pakhat an hruaibo a, he thil thleng chungchangah hian Police leh khawtlang hruaituten a theih ang angin hmalakna an kalpui mek.

The Lawngtlai Post Editor, Lalngheta Ralte hnen atanga thu kan dawn danin, Hmawngbuchhuah khua hi Lawngtlai District chhimlam, Myanmar ramri hnaih a awm niin Lawngtlai atanga km 86 vela hla, Mog hnam hlang awmna a ni a. Lawngtlai SP mawhphurhna la mektu C. Lalruatkima'n The Lawngtlai Post a hrilh danin, Thawhtanni tlai thimhlim a mi pathum, hmaituam, silai keng an khuaa lut te chuan, November ni 6, 2022-a Hmawngbuchhuah khaw nula, Mizinthui, (a Mizo hming Sangte-i) nena innei Rachathaimo chu an hruaibo a, Sangtei pasal hi Tripura lam chhuak niin, Mog hnam a ni a, Guwahati a an Sakhaw puithiam te awmna hmun a khawsa niin an sawi.

Pathianni khan Sangtei leh Rachathaimo te hi inneiin Thawhtanni khan Sangtei u chuan chaweiah sawmin, chaw an eikham an hawlam in misualte hi an tawng a, Sangtei pasal hi an lo man bet a, hetia a pasal an man hian Sangtei chu a au a, Sangtei a aulai hian an zinga pakhat chuan leilam ah a silai vawikhat a hmetpuak a, silai puak a hlauh avangin Sangtei chu an In lamah a tlanchhia a, hemi hnu hian a Pasal chu heng mi pathumte hian an hruaibo ta ni.

Inrukbona thlenna hmun hi Bungtlang South Police ten pan nghalin, Lawngtlai atangin thil awmdan enfiah a, hnuchhui hna thawk turin Police tirh belh an ni bawk a. He thil thleng avang hian Hmawngbuchhuah leh a chhehvel khua te an ralkhel viau a, Police leh khawtlang hruaituten a theih ang angin hmalakna an kalpui mek a ni.

Comments

Popular News (Last 30 Days)

LPG man bithliah thar