Eng chhit man pek lawk (Pre Paid) kalpui turin P&E Department-a thawktute buatsaih mek

India ram-a Electric Eng chhit man (Bill) pek lawk (Pre-Paid System) theiha leh vek tura ruahman angin Mizoram-ah pawh hmalak mek zel a ni a. Hemi atan hian P&E Department-a thawktute tan National Power Training Institute (NPTI) chuan Training a rawn buatsaih mek a ni.

Sawrkar laipui Flagship Programme kalpui mekah India ram puma Electric Eng chhit man (Bill) chawi dan pek lawk (Pre-Paid System) theiha leh vek tura ruahman ah hian Design Build Finance Operate Own and Transfer (DBFOOT) Model hmangin Advance Metering Infrastructure Service Provider (AMI-SP) pakhat Department-in a ruai dawn a. Anni hian Pre-Paid-a kan Electric Eng chhit man kan top -up mai theihna tura thil tul zawng zawng an ngaihtuah vek anga. Top-up na tur hian sawrkar laipui chuan a thlawna hman tur Mobile apps a siam tawh a, he apps atang hian kan Bill pek dan leh balance te chu mahni awm hmun atangin a en theih mai tawh dawn a ni. He hna hi hautak tak a nih avangin AMI-SP hian hna an thawh zawh hnua hian kum 10 chhung vel an enkawl chhunzawm bawk dawn a ni.

Smart Meter Pre-paid Mode kalpui theih hunah chuan Meter Reading lak atanga Bill siam tlengin mihring an inrawlh tawh dawn loh avangin Bill siam sual lakah thui tak min veng thei tura beisei niin Mobile apps hmangin Electric Eng kan chhit man pek lawk tawh tur a ni dawn avangin Electric Bill chhut chhuahna atan tha leh sum sen a ngai tawh dawn lo a ni. Heng bakah hian Smart Meter kan hman hunah chuan Control Centre atangin Meter Disconnect leh Re-connect a tih theih tawh dawn a, bill ba chu chawplehchilh in a hmuna kal kher ngai lovin tih thim nghal theih an ni dawn a. Chutih rual erawh chuan consumer-in a hman tawk te te in a Eng chhit man zat tur thla khatah vawi 2 emaw, vawi 3 te pawh a Top-up thei tawh dawn a, thla tawpa a hlawm a pek tawk kha awm tawh dawn lo a ni.

Pre-Paid Smart Meter hian Communication atan Wireless a hman dawn avangin Meter dahna atan hmun ualau deuh a ngai tawh dawn a, hmun biru leh signal hmuh that theih lohnaa Meter dahnate chu hmun ualau zawka dah a nih dawn avangin Department hmalakna tha taka lo tawiawm turin mipui (Consumer) te chu ngen an ni a, Post-Paid atanga Pre-Paid-ah insawn a ngaih dawn avangin nakin-ah harsatna kan tawh loh nan Electric Bill ba te lo pe fel zel tur leh Contracted Load te pawh Eng kan chhit tarn lai ber ang mila lo in update turin an ngen bawk.