Chaltlang Tourist Lodge Annex Building hawng

Cheng nuai 487.45 senga sak Chaltlang Tourist Lodge Annex Building chu nimin khan Tourism Minister Robert Romawia Royte chuan a hawng.

Tourism Department Director Saitluanga Chaltlang Tourist Lodge Annex Building thar hawnna hunah hian Tourism Minister chuan Mizoram Tourism Department-in hma a sawn nasatzia leh khualzinte tana thlenna tur nuam tak Tourist Lodge Annex building a hawng thei chu lawmawm a tih thu a sawi. Sawrkar laipuiin ‘Responsible Tourism’ leh ‘Sustainable Tourism’ a kalpui mek behchhanin Mizoram pawhin ‘Mizoram Responsible Tourism Policy 2020’ a kalpui mek a, Tourism Department-a Officer leh Staff te inpekna leh thawhrimna zarah Tourism Department chu department chhuanawm tak a ni mek zel tih a sawi bawk. Tourism Minister chuan Mizoram chhunga Tourist Lodge-te chu mipuiten thlen nan hmang fo se, mipui leh sawrkar sum tuakna a ni tih hre rengin Lodge hmang uar zual tura a duh thu a sawi bawk.

Chaltlang Tourist Lodge Annex Building sakna hi Destination Development Scheme in the State of Mizoram, Ministry of Tourism (NE Section) hnuaia hmuh a ni a. He building hi chhawng 4 (Basement-2, Basement-1, Ground Floor leh 1st Floor) a sang niin Basement-2 ah Type-1 Quarter 6 a awm a, Basement-1 ah Conference room mi 280 leng, Board Room mi 75 leng, Store room leh Lounge te a awm a. Ground Floor-ah VIP Suite 2 leh Room 8 awmin, 1st Floor ah VIP Suite 2, Room 8 leh Store room 2 a awm bawk.