4 Lane laih tura Package then dan tha ti lo

Zo-Fa Tangrual Pawl (ZTP) chuan NHIDCL ten Highway 4 Lane an siam tura Package an then dan chu tha an tih loh thu an sawi.

Niminpiah-a Aizawl-a thuthar thehdarhtute an kawmna ah ZTP chuan NHIDCL ten Highway 4 Lane an siam tura Area Package an then danah Package 1 leh 2 te Assam lama a dah ngawt chu thil fel lo a ni tih sawiin, Official-a ramri chinfel a hnih hma a an duh dana Mizoram leh Assam chin an lo then ngawt chu an pawm loh thu an sawi a. Zo-Fa Tangrual Pawl (Zo-Fa Allied Organisation) Vice President Paul LT. Chhangte chuan, “NHIDCL-in Package 1-4 an lo then hi 1875 Bengal Eastern Frontier Regulation-in Cachar leh Lushai ramri a siam, Lushai (Mizoram) chhung veka mi a ni a. Keini ZTP chuan Mizoram chhung vekah kan ngai a, chuvang chuan Assam kut-a Package 1 leh 2 a awm tur hi kan pawm lo a ni,” a ti.

ZTP hruaitu chuan Assam leh Mizoram ramri Official-a siam fel a ni hma hauha Assam leh Mizoram ramri NHIDCL ten an lo thenfel ngawt chu a dik lo tih sawiin, “Compensate document engkim siam a ni dawn a, Nakin-a ramri chinfel a nih dawna harsatna min thlen thei tur a nih dawn vangin, keini chuan tha lo tiin kan pawm lo a ni,” an ti a. Kawng tha kan neihna tur pawh ni se, ram zau tak ziaka Assam lama dah a nih ai chuan he 4 Lane kawng hi hnawl ngam rih tha an tih thu leh Survey of India in ram chin dik taka min siamfel hnuah Pathian zarah kawng tha tak siamna hun chu a la awm an beisei thu an sawi bawk.