Mizoram in National Hydrology Project atan cheng nuai 1852.25 hmu tawhin hmalakna kalpui mek a ni

Irrigation and Water Resources Department (IWRD) hmalakin Mizoram-ah National Hydrology Project (NHP) chu kalpui mek a ni a, he Project kalpuina atan hian Mizoram chuan cheng nuai 1852.25 hmu tawhin he Project hnuaia hmalakna te hi Data lakkhawmna atan hman tan mek a ni.

National Hydrology Project (NHP) chungchang inhrilhhriatna hi nimin khan thuthar thehdarhtute tan IWRD Minister C.Lalrinsanga hovin IWRD Conference Room, Aizawl-ah neih a ni a, he huna tarlan a nih danin National Hydrology Project in a tum ber chu ramchhunga tuihna leh tuilakna Water resources hrang hrangte Technology hmanga zirchiang a, Data rintlak lakkhawm leh tangkai taka hman a nih theih nana phochhuah a ni a. NHP hi sawrkar laipui hmalakna niin a sum senso pawh sawrkar laipuiin a tum vek a ni a. Kum 2016 khan he Project hi lo piangin 2024 thleng kalpui tur a ni a, India rampum huapa hmalak niin Mizoram-ah chuan IWR Department hi kengkawh tura mawhphurhna pek an ni a. NHP hnuaiah hian Mizoram tana sum ruahman chu cheng nuai 3277 niin cheng nuai 1852.25 hmuh a ni tawh a, cheng nuai 1735.29 hman ral a ni tawh bawk.

Tun dinhmunah NHP kaltlangin Mizor-am-ah Hydro-Met Data Station 53 bun mek niin a dang 6 bun leh tura inremna thuthlung ziah a ni tawh a. Ruahtui tla zat tehna Automatic Rain Gauge chu hmun 27 ah dah ni tawhin Automotatic Weather Station hmun 10-ah dah niin 8 bun fel a ni tawh a, leihnuai tui awm zat hriatna Piezometer chu hmun 20-ah bun tum niin hmun 10-ah zawh a ni tawh a, tui luang tehna Gauging & Discharge Station hmangin lui 22-a hmun 27-ah teh tum niin hmun 16 ah zawhfel tawh a ni bawk.

Heng Station atanga Data lakkhawm hi IWRD CE Office-a Data Centre, Aizawl-ah darkar tin khawl hmanga thawn reng a ni tawh a, mipui a duh apiangin a thlawnin an hmang tangkai thei dawn a ni.