Serchhip District-ah nungcha tihlum lai Social Media-a thehdarhtu mi pahnih man an ni tawh

Thenzawl Forest Division-a Divisional Forest Officer (DFO) Lalbiakchama Chawngthu chuan Youtuber thenkhat, Thangkam dan leh Thang hmanga Sava leh nungcha dangte tihlum thin an awm tih sawiin, hei hi Wildlife Protection Act 1980 kalh a nih angin Serchhip District chhungah pawh mi pahnih chu pawisa chawi tir an nih tawh thu a sawi.
National Wildlife Week vawi 68-na kharna puala inkhawm Inrinni kalta-a Thenzawl Forest Range buatsaiha Joint YMA Hall, Thenzawl-a neih a hmanpuina ah he thu hi sawiin Thenzawl DFO chuan, “Wildlife Protection Act 1972 chuan Sava veh leh Thangkam te chu a khap a, Youtube leh Facebook lamah hetiang an ti lai Video tlangzarh avangin Dan tlawhchhanin man theih an ni,” a ti a, “Serchhip District chhungah pawh Youtuber pakhat leh Facebook lama phochhuaktu mi pakhat chu man niin pawisa tam tham tak chawitir an ni a, intiamkamna ziahtir an nih bakah an Post te delete tir an ni tawh. An ti nawn leh a nih chuan lung In a tan tir thlenga hmalak a ni ang,” a ti a. Hetiang kawnga dan bawhchhia te man chhuah kawngah department hmalakna te tawiawm a, thawhpui zel turin khawmte a ngen bawk.


Thenzawl DFO chuan Mizoram chu biodiversity nei tha tak State kan nih thu leh heng kan biodiversity leh nungchate zirbingna nei turin State dang atangin Research Scholar te an lo kal reng thin tih a sawi a, thiamna phurchhuak in Ph.D leh Degree dang pawimawh tak tak an neih phah a, kan ram nungcha leh thing leh mau te hmangin an career an siam thin tih a sawi a. Chutih lain a ram neitu zawkin kan nungcha leh biodiversity te hlut nachang hre lovin, dan kalh in kan tihlum a, silai in kan kap a, Tur te in kan hraihlum a. A sa te kan zuar bawk a. Hei hi thil atthlak leh sim vat tul a nih thu a sawi bawk.

National Wildlife Week kharna puala inkhawm ah hian Thenzawl Forest RO Bathseby Lalremruati chuan inlawmna thu sawiin mitin ten keimahni zawn theuh ah nungcha humhalh kawngah hma kan la thei tih a sawi a. He hunah hian nungcha humhalh chungchanga Recitation Competition chu Middle School zirlai naupangte tan Mizo leh English Category-ah neih niin nungcha humhalh chungchanga Poster insiam siakna leh Essay Writing-a inelna neih a ni bawk. Heng inelna hrang hranga tithate hnenah hian lawmman semna neih nghal niin pawisafai leh Certificate hlan an ni a, he hunah hian nungcha humhalh chungchanga Poster nalh leh awmze nei tak tak an siam te chu mipuite en theih tura phochhuah a ni bawk.


National Wildlife Week kharna hunah hian Thenzawl-a YMA Branch hruaitute, College of Horticulture, Central Agriculture University, Thenzawl-a thawktute leh zirlai te, Thenzawl khawchhunga School hrang hrang zirtirtute leh naupangte an tel a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man