Serchhip-ah Faina Hapta 2022 kharna neih niin VC Area fai ber ah Vengchung VC thlan a ni

Faina Hapta vawi 46-na Mizoram-a hman chu Inrinni khan kharna neih niin Serchhip-ah pawh Faina Hapta kharna hun hi Bawrhsap mawhphurhna la mektu Addl. DC Lalmuansanga Ralte hovin neih a ni a. Serchhip Town chhunga Village Council Area fai berah Serchhip Vengchung VC chu thlan a ni.

Serchhip DC Conference Hall-a Faina Hapta kharna inkhawm ah hian Addl. DC Lalmuansanga Ralte chuan Faina chu hriselna te, changkanna kawng tinreng nen a inzawm avangin a Hapta chhung chauhva va uar ringawt tur kan ni lova, kumtluana kan nunpui reng tur thil pawimawh a ni, a ti a. “Serchhip mipuite pawh kan fai tawh em em a, hmuh theihin hma kan sawn a ni,” a ti. Serchhip Addl. DC chuan India sawrkarin faina beihpui a rawn thlak hma kum 1977 atang tawh khan Faina hi Mizoram-ah sawrkarin a lo kalpui tawh tih sawiin, chumi zarah chuan State dangte nena khaikhin chuan kan ram hi a fai em em a, kan lo fin hmasak man kan tel chho zel a ni, a ti a. Faina lama District chhunga Village Council hrang hrangte hmalakna fakin, an hnathawh thinte an hriatpui thu a sawi a, kumin atang hian Serchhip Town chhunga Village Council 14 te chu faina lamah kum tluana an that dan indawta rem (ranking) an tum thu pawh sawiin, “Kumin Faina Hapta atang hian bul kan tan a, tuna Veng fai inelnaa Veng tinte points score atang hian kan tehzui zel tawh dawn a ni,” a ti a. Hma lam pan tuma bei zel tura District mipuite chahin, “Mizote hian dan ang taka tum neia hma kan lak ve tawhna ah chuan India rama a tha ber pawl kan han ni ve thei zel a, hei hi i hrereng ang u,” a ti bawk.


Serchhip-a Faina Hapta kharna hun hi District Urban Development Officer (DUDO) Lalrinsanga Hnamte chuan kaihruaiin Faina Hapta chhunga Village Council fai thlanchhuah pathum te hnenah lawmman hlan niin Serchhip Vengchung VC chuan lawmman pakhatna lain Rs. 10,000/- leh Citation an dawng a, pahnihna Serchhip Kawnpui VC in Rs. 7000/- leh Citation dawngin Field Veng VC chu pathumna niin Rs. 5000/- leh Citation an dawng bawk.

Hei bakah hian Faina kawnga sum leh pai-a hlawkna um lova hma la tha mimal 4 te hnenah chawimawina hlan ni bawkin chawimawina dawngtute hi C. Laldinpuia (Serchhip Chhim Veng), Rohmingthanga (Serchhip Bazar Veng), PC. Lianrengpuii (Serchhip Hmar Veng) leh Lalrinmawii (Chanmari Veng) te an ni a, heng mite hi pawisafai leh Citation hlan an ni bawk.


He hunah hian VC Fai endiktute atangin Samuel Lallawmzuala, District Coordinator SBM (G) chuan VC fai endik hna an kalpui dan tarlangin, Serchhip khua in Faina lamah nasa takin hma kan sawn nia an hriat thu leh hmalak zuina tur erawh ala awm thu a sawi a, UD&PA Department atangin RC. Lalthianghlimi, MIS Coordinator, Swachh Bharat Missions (Urban) chuan Faina Hapta chhunga nitin-a hma an lak dan te tarlangin kumin a Faina Hapta-ah hian ‘Bawlhhlawh paih hmaa thliar hran’ tih chu thupui-ah hman a ni a, he thupui hmang hian zirna In leh Bazar hmun bakah Vantlang hriat turin aurinna hmangin inzirtirna hrang hrang neih a ni bawk.

Serchhip Town VC dinhmun :

VC Hming Point Rank 

1. Serchhip Vengchung 155 1st

2. Serchhip Kawnpui 147 2nd

3. S. Field Veng 145 3rd

4. S. P&E Veng 141 4th

5. Chhiahtlang North 141 4th

6. S. Hmar Veng 139 5th

7. S. Kawnpui North 136 6th

8. S. Dinthar 126 7th

9. S. Chanmari 126 7th

10. S. Chhim Veng 125 8th

11. New Serchhip North 118 9th

12. New Serchhip South 118 9th

13. Chhiahtlang South 113 10th

14. Serchhip Darnam 86 11th

Comments

Popular News (Last 30 Days)

Vawiin-ah HSSLC Exam result

LPG man bithliah thar