Serchhip-ah Pandal sak hna thawh tan a ni

Kumin November 18-20 chhunga Serchhip in Salvation Army thalai khawmpui lian, India Eastern Territory (IET) Salvation Army Youth (SAY) Congress a thlen tura Pandal sakna tur bungrua chu nimin zing khan Serchhip rawn thlenpui niin Pandal sak hna thawh tan nghal a ni dawn.
Serchhip P&E Veng Leisekawt Mual-a IET SAY Congress neih turah hian palai sing khat vel tel tura beisei a ni a, he inkhawmpui neihna tur Pandal sakna atan hian Lunglei-a Sub-Hqrs. YMA Pandal Structure chu hawh niin nimin khan Truck pathum (3) hmangin rawn phurh thlen a ni a, Serchhip CO Bial-a SAY member ten hnatlang neiin a hlanthlak hna an lo thawk thung a ni.


SAY hruaitute chuan Pandal Structure hi a dung ft. 144 leh a vang ft. 90 a ni tih sawiin, hei hi a thiam zawkte ruaiin hlawhfa tha-a remkhawm a nih tur thu an sawi a, hemi bakah hian a sir lamah zauh belh tur niin Pandal leh Stage pumpui hi a dung ft. 190 leh a vang ft. 120 ni tura hisap a ni tih an sawi a, ni 10 chhung velin Pandal Structure hi peihfel an beisei thu leh hemi hnu hian hnatlang in a cheimawi hna leh a sir-a buk hrang hrang zar hna chu thawh tur a ni tih an sawi a, thla thar November 13-ah Pandal hlanna inkhawm nei hman tura peihfel an in beisei thu an sawi a ni.

Nimin khan Pandal sak tur hnatlang bultanna hi Maj. Lalrinpuia, DYS Central South Division kaihhruaiin neih a ni a, Maj. K. Rohlupuia, TYS chuan tawngtai-a inhlanna hun hmangin hna thawh tan a ni a, nimin vek khan hnathawktu turte pawhin Serchhip hi an thlen tawh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar