MLA Fund atanga Sialhau khaw tui lakna leh Volleyball Court siam thar bialtu MLA in a hawng

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhung Sialhau khua ah MLA Fund hmanga Tui pump-na leh Volleyball Court siam thar te chu a hawng.
Heng thil pahnih hawnna puala inkhawm Sialhau Community Hall-a neih ah bialtu MLA Er. Lalrinawma chuan Tui Pump thar leh Volleyball Court thar hawn a ni ta chu Sialhau khawtlang tan hun hlimawm tak leh ni chhinchhiah tlak nia a hriat thu sawiin, “He ni kan hman theih chhan hi Sialhau mipuite inpekna avang leh thawhrimna vang a ni,” a ti a. “Tuilakna thar chuan mipuite nitin nunah awlsamna nasa zawkte, hriselna leh thianghlimna lama hmasawnna duhawm zawkte a thlen dawn a ni,” tiin chutiang bawkin Volleyball Court thar pawh thalaiten infiamna lama hma an sawn phahna tur a nih ngei a beisei thu a sawi a ni.

Deputy Speaker chuan, hmasawnna hrang hrang kalpui mek leh lo la awmzel turah te mipui leh sawrkar an thawhho that a pawimawh thu sawiin, thawhhona a that phawt chuan hnathawh a thain a chak bik thin tih a sawi a. Hei bakah hian hmasawnna ruhrel kan neih ang ang te mipuiten mahni ta ang taka kan enkawl thiam a pawimawh thu sawiin, “Vawiina kan hawn takte pawh hi a enkawl zui zelna ah khawtlang mipuiten mawhphurhna sang tak kan nei a ni tih i hria ang u,” tiin Sialhau mipuite a chah a ni. Infiamna lama tui mite tan eizawnna kawng zau tak a inhawn thu pawh bialtu MLA chuan sawiin, infiamna chu eizawnna tling anih bakah hriselna atan pawh a tangkai em em a. Nunkawng dik lo leh tha lo tak takte laka inthiarfihlima taksa leh rilru hrisel zawk neih nan Volleyball Court thar chu thalaiten lo hmang turin a chah a ni.

Nimin-a Sialhau Tui pump-na leh Volleyball Court siam thar hawnna inkhawm hi Sialhau VCP PC. Lalduhsanga chuan kaihruaiin MHIP President VL. Hriatpuii chuan hunserh a hmang a, VC Secretary V. Lalduhzuala chuan Report pein Tuivamit Tui pum leh Volleyball Court hi Tuikum Bial MLA Fund atanga thawh an ni a. Tuivamit tui hi khua atanga Kilometer khat vela hla a mi niin khaw chhungah pump thlen a ni a, khua ah hian Tanky pahnih siam niin chuta tang chuan sem darh leh a ni a. A Fur a thala khawtlang mamawh phuhru thei tura ngaih a ni.

He hunah hian Sialhau Secondary School-a zirlai titha chawimawina neih nghal niin chawimawina thilpekte hi khuallian hian a hlan a. Zirlai titha chawimawina hlan tlak engemawzat an neih theih avanga lawmthu sawiin, zirlaite chu nakin lawka kan hruaitu turte an ni a, nungchang uluk a, zirtitute leh nu leh pate thuawih turte, nasa zawka inzir zui zel turin a chah bawk a ni.