Samagra Shiksha leh Sports Association 5 thawkho dawn

Samagra Shiksha Mizoram leh Sports Association panga (5) te chuan nimin khan thawhhona thuthlung ziakin Kick-off programme neih nghal a ni a, School Education Minister Lalchhandama Ralte chuan a hmanpui a ni.

School Education Directorate Conference Hall, Aizawl-a thawhhona thuthlung ziahna ah hian Mizoram Boxing Association, Mizoram Badminton Association, Mizoram Football Association, Mizoram Weight-lifting Association leh Hockey Mizoram aiawhte nen thawhhona thuthlung hi ziah a ni a. Samagra Shiksha Mizoram chuan Grassroots Level Sports Development Programme (GSDP) atan hian Mizoram hmun hrang hrangah Centre 40 a din dawn a. District tinah District Level Management Board din a ni dawn a, Board hian Trainer leh Asst. Trainer te District Sports Association te nen inrawntlangin a la dawn a ni.

Centre nghah chhan School tur sawrkar School chu District Level Management Board ten an thlang anga, he Programme hi Thla 6 kalpui tur niin Centre tinah naupang 30 zel an awm anga, an zingah hmeichhia panga (5) aia tlem lo an tel tur a ni. He programme in a tinzawn chu Elementary School naupang kum 6 -14 inkar sawrkar sikul naupang te an ni. Naupangte training na tur bungrua State Project Office atangin ngaihtuah a ni dawn a, naupang zirna ti bahlah lo tur zawngin kar khatah vawi hnih emaw, vawi thum emaw Training hi neihpui thin an ni dawn a ni.

Thawhhona thuthlung ziahnaah hian Minister Lalchhandama Ralte chuan NEP 2020 bawhzuina kal zelah Discipline hrang hrang 5 te nen thawhhona thuthlung ziah a ni ta chu lawmawm a tih thu sawiin, nakum ah huamzau zawka hmalak theih beisei a nih thu leh Trainer leh Asst. Trainer turte chu Sports Association tin te'n an rawn rawt chu lak an nih thu a sawi bawk.