Wine Rule thar siam avangin Champhai mipui chauh nilo Mizoram pum a lawm - Dr. K. Beichhua

Excise & Narcotics Minister Dr. K.Beichhua chuan Wine Rule thar siam avangin Champhai mipui chauh nilo Mizoram pum a lawm thu sawiin, Grape chingtute chu Grape quality tha leh changkang zawk, thianghlim zawk, tam leh hrisel zawk thar theuh tum turin a sawm bawk.

Champhai Grape Growers Society (CGGS) ten Grape Wine Rules thar lawmna hun nimin-a Champhai Winery Packing Hall, Tlangsam-a an buatsaih a hmanpuina ah he thu hi sawiin Excise & Narcotics Minister Dr. K. Beichhua chuan Mizoram Liquor Prohibition Rules, 2022 buaipui dan te sawiin, hemi bik zirchiang tura High Level Committee din a nih thu leh a zau thei ang bera inrawnkhawmna neih a nih hnuah rawtna thlente ngun taka ngaihtuah nawn fo a nih hnuah pawm a nih thu a sawi a. Wine Rule thar siam avangin Champhai mipui chauh nilo, Mizoram pum a lawm thu sawiin, Politics kal dik leh fuh hmangin ram hmel a thlak danglam theih thu leh a siam that kawnga tanrual a tul thu a sawi bawk. Dr. K. Beichhua chuan Ram tana hmelma lian ruihhlo do kawngah tanrual a tul takzet thu sawiin, “Ruihhlo do kawngah tumah kan ralbang bik thiang lova, engtik lai pawhin min tibuai thei reng a, a la tlai hma hian kan zavaiin thahnemngai takin i do tlang zel ang u,” tiin mipuite a sawm a. Champhai District mipuite chu ruihhlo leh a kaihhnawih do kawnga theihtawp chhuaha sawrkar tawiawm tlat thin turin a sawm bawk a ni.

Champhai Grape Growers Association tih thin chu Winery din a nih dawn avangin kum 2007 khan Champhai Grape Growers Society ti a thlakin Firms & Society-ah inziahluh a ni a, khatih laia Agriculture Minister leh tuna State Planning Board Vice Chairman H. Rammawi hmalakn ain MIP sum cheng nuai 83 hmanga bultan niin, kum 2010 khan Grape quintal 918 leiin bul an tan a, kumin hian quintal 1144.98 an lei tling a ni. Champhai Grape Growers Society-ah hian Governing Board Member 15 awmin kum 2 danah inthlan thin a ni a, tun dinhmunah Champhai Grape Growers Society-ah hian member 135 awm mekin, Staff leh Worker mi 30 an awm mek bawk a. Champhai Grape Growers Society hnuaiah hian Branch 9 an awm mek bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar