Biate khua in kum 5 fai lawmman lak an lawm

Biate Town Faina Committee in a zawna kum 5 chhung khaw Fai lawmman an lak lawmna chu nimin khan Biate-a Zialung Community Hall-ah aan nei a, Deputy Chief Minister Tawnluia chuan khuallian niin a hmanpui a ni.

Deputy Chief Minister chuan Biate khua leh a mipuite chu faina kawnga an hmalakna avangin Mizoram pum tan entawntlak a nih thu sawiin, ODF Plus-ah inhlangkai tura tan an lak a duh thu a sawi a. Aizawl leh District khawpuiah te bawlhhlawh sawngbawlna hmun, Solid Waste Management Centre siam ni mah se chhungkua ah bawlhhlawh tawih thei leh thei lo thliar kan inzirtir leh kan tih a pawimawh thu a sawi bawk.

He hun hi Home Minister Lalchamliana pawhin hmanpuiin a bial Hrangturzo chu faina kawngah a hmahruaitu nia a ngaih thu a sawi a, khua (Town) fai ber Biate bakah khua (Village) fai ber Leng a awm bawk a, tuihna humhalh kawngah rampum huap lawmman an dawn te chuan hei hi a ti chiang hle nia a hriat thu a sawi bawk.

Kum 2017 atanga 2021 thlenga Khawfai Intihsiakna ah te Biate hian Other Urban Towns Category-ah lawmman 1-na bakah khaw fai ber Overall Prize khaw fai ber lawmman an la bawk a. Swacch Survekhshan 2018 hnuaiah Hmarchhakah Best Innovation & Practices lawmman leh Swacch Survekhshan 2020-a Hmarchhak bikah Best Citizen Feedback lawmman an dawng bawk a. Heng bakah hian Kayakalp hnuaia damdawi In fai thlannaah CHC leh Sub-Centre fai ber lawmman te an lo la thin tawh a. Hmarchhak leh India ang pawhin Biate hi khawfai berte zingah a lang pha bawk a ni.