RTI Act a tha lo zawng leh mimal inbeihna atana hmang lo turin mipui ten mawh an phur - Governor

Mizoram Governor Hari Babu Kambhampati chuan RTI Act chu mipui sawrkara thuneitute khalh ngilna atana thil tangkai a ni tih sawiin, “A tha lo zawng leh mimal inbeihna atana hmang lo turin mipuite leh RTI hmangtute pawhin mawh an phur a ni,” a ti.

Right to Information (RTI) Week, 2022 hawnna inkhawm nimin-a Assdmbly Conference Hall, Assembly Annexe-a neih khuallian nia a hmanpuina ah Mizoram Governor Hari Babu Kambhampati chuan RTI Week 2022 hman a ni leh thei ta chu lawmawm a tih thu sawiin, RTI Act hman a nih tan dan te, mipui sawrkara thuneitute khalh ngilna atana a tangkaina te leh langtlang sawrkar a awm theihna atana a pawimawhna te a sawi a. RTI tangkaina te a sawi rualin hman sual a nih theih thu sawiin, “A tha lo zawng leh mimal inbeihna atana hmang lo turin mipuite leh RTI hmangtute pawhin mawh an phur a ni,” a ti.

Governor chuan Mizoram Information Commission (MIC) chuan hna a thawk tha hle tih pawh sawiin, kumtin Assembly a pharh tura Annual Reports te a hun takah an buatsaih thin chu lawmawm a tih thu a sawi a. MIC hmalakna leh a thawhpui GAD leh ICT te inpekna a zarah Online RTI Application hman a ni ta chu hmasawnna a nih thu a sawi a. Hei hian RTI diltute zinga Office pan harsat deuh te tan awlsamna a siam sak mek a; sum leh pai bakah hun hlu tak RTI dilna atana sen ngai thin pawh a ti ziaawm sawt dawn a ni, a ti. RTI chu sawrkar khalh ngil na atan khua leh tui ten phur takin hmang zel se a duh thu pawh Governor chuan sawiin, MIC lam pawh hna tha chhunzawm zel turin a fuih a, RTI chungchanga mipui zirtirna pawh uar zawka buatsaih chhunzawm zel turin a chah bawk a ni.

Nimin-a RTI Week hawnna inkhawm ah hian Mizoram Chief Information Commission Lalnunmawia Chuaungo chuan inlawmna thu a sawi a, RTI hmangtu langsar Vanneihthanga Vanchhawng leh Lalnuntawma Fanai te pawhin he hunah hian RTI dilna kawnga an thil tawn te an sawi a. Sawrkar hnathawkte in enfiah a tul na ngai lai te sawiin, RTI hnathawk tha an lo awm avanga mipui tana thil tangkai tak tak information an haichhuah a nih chungchang te an sawi.

He hunah hian RTI Week denchhena a Slogan Writing Competition buatsaih a College zirlai lawman dawngtute hnenah Governor hian lawmman a hlan bawk a ni.