Hman khat daih sarang hman khapna Mizoram-ah mipui ten an la zawm tha tawk lo

Hman khat daih sarang (Single Use Plastics) chu sawrkar laipui chuan July 1, 2022 atang khan hman a khap a. Mizoram-ah pawh he khapna dan hi kenkawh nghal ni mah se mipuiten an la zawm tha tawk lo hle niin a lang a, Bazar leh sumdawnna hmunah te hmang an la thahnem hle.

Mizoram Pollution Control Board Member Secretary leh hman khat daih sarang khap kawnga mawhphurtu State Special Task Force-a Secretary ni bawk Er. C.Lalduhawma chuan Single Use Plastic hi hmang lo tura GAD-in Department hrang hrangte a hriattir avangin sawrkar Office-ah te chuan aan zawm tha hle tih sawiin, hetihlai hian Bazar leh dawr tam tak chuan an la zawm tha lo hle niin a sawi a. Er. C.Lalduhawma chuan, “July 1, 2022 atang khan 75 micron chin chu khap a ni a. He khapna hi sawrkar Office bakah Airport, Rel Station leh Industry te kan endikna ah chuan zawm a hlawh hle a. Mahse hetihlai hian he dan kenkawh kawngah kan chak tawk lo deuh nge ni central-a kartin Report kan pekah chuan man kan la nei lo tiin kan report thung,” a ti a. Plastic pan chi chu dawr tam takin an hmang tawh lo nia sawiin, Coffee dawr te pawhin Paper Cup an hmang a, Catering ti thinte pawhin plastic an hmang tawh lo niin a sawi bawk.

Aizawl khawpui-a Plastic lam zuar thin sumdawng te chuan sawrkar laipuiin hetiang plastic a khap avangin Thleng, Plate leh No te chu phai lam atangin a lo thleng ngai tawh lo tih sawiin anmahni pawhin zawrh tur an nei tawh lo niin an sawi a. “Mi thenkhat Plastic No leh Thleng rawn zawng hi an awm leh zauh zauh a; mahse, kan kawl tawh loh avangin a aia to deuh Paper thleng leh Kuhva kawr atanga siam te an lei mai thin a. Thenkhat chuan to an ti deuh thin a ni,” an ti.

India Sawrkar laipui thuchhuak, Plastic Waste Management Rules 2016 leh UD&PA Mizoram thuchhuak in a tarlan angin Mizoram chhungah hman khat chauh daih plastic, Single Use Plastics (SUPS)-te chuan kan ram leilung, boruak leh luite a ti bawlhhlawhin, mihring hriselna a tha lo zawnga nghawng thei a nih avang leh Khuarel chhiatna nasa takin a belhchhah bawk avangin hman khap a ni a. Hemi ang hian hman khat daih Plastic te hi July 31, 2022 ralhma ngeia tih ral vek tur a nih thu leh a hnu lamah ram pawn leh hmun dang atanga lakluh, zawrh leh hralh chhuah phal a nih loh thu Serchhip District-ah pawh chhuah a lo ni tawh a ni.