Larsap leh Senator inkawm

Mizoram rawn tlawh mektu Australian Senator Dean Smith chuan nimin tlai khan Mizoram Governor Hari Babu Kambhampati chu Aizawl a Raj Bhavan-ah a kawm.

Governor Hari Babu Kambhampati chuan Australian Senator Dean Smith chu Mizoram-ah lo lawmin, Mizoram a rawn tlawh chhan te a zawt nghal bawk a. Governor leh Australian Senator inkawmnaah hian Mizoram dinhmun leh hmalakna te an sawidun a. India leh Australia te inlaichinna chuan tunhnai ah nasa takin hma a sawn tih sawiin, insumdawn-tawnna bakah kawng hrang hrangah an in thian thatna hi ti ngheh a ni mek zel tih an sawi bawk.

Senator Dean Smith hian Mizoram a rawn tlawhchhan pawimawh tak pakhat chu Myanmar raltlante chungchang a ni tih Larsap nen an inkawmna ah hian a sawi a. Mizoram sawrkar in engtin nge hma a lak tih te bakah Refugee te ngaihsak an ni em tih te a zawt a. Governor Hari Babu Kambhampati chuan Myanmar sawrkar sipai thuneihna hmanga paihthlak a nih hnuah Mizoram hmun hrang hrangah raltlante an rawn lut a, hei hi humanitarian ground angin khap emaw dan a ni lova. Raltlan tam tak te hi Chin State a Mizo hnahthlak te an nih thu sawiin, Mizoram mipui ten an theih anga tha in an lo chhawmdawl a, Sawrkar pawhin thil tul bikah chuan hma a la thin tih a sawi bawk a ni.

Senator Dean Smith chuan Mizote leh Chin State a cheng te chu unau an ni tih a lo hriat thu a sawi a. Australia-ah Chin State mi tam tak an awm mek thu leh Australia sawrkarin a ngaihsak thu te a sawi a. Myanmar mipui sawrkar sipai thuneihna hmanga paih a nih tak avanga mipui tawrhna chu Australia sawrkar chuan pawi a tih thu te sawiin, Myanmar sawrkar thiltih dan pawh uluk takin a thli thlai mek a. India chu thian tha a nih anga Myanmar raltlante tha taka lo enkawl turin a ngen a ni.

Comments

Popular News (Last 30 Days)

Vawiin-ah HSSLC Exam result