RTI Act chungchang zirhona Serchhip-ah neih a ni
Serchhip DC Conference Hall-a RTI Act leh RTI Online Mizoram chungchang zirhona hi Bawrhsap mawhphurhna la mektu Addl. DC Lalmuansanga Ralte chuan hmanpuiin ram changkang zelah khua leh tuiten sawrkar hmalakna leh hnathawhte hriat chian deuh deuh an duh a. Chu chu an chanvo anih bawk avangin an hriat duh leh an zawhnate tha taka an lo chhan zung zung theih nan an inbuatsaih a ngai tih a sawi a. Mipuiten awlsam zawka RTI zawhna an zawh theih nan online application siam a nih tak avangin he Application thar hi an zir ve a tul bawk avangin he training-a tel te chuantha taka an zirlaite an ngaihven a tul thu a sawi bawk a ni.
Sawrkar laipui-a Department of Personnel and Training, Mizoram sawrkar-a Administrative Training Institute leh Serchhip DC Office tangkawp ten an buatsaih he training-ah hian Serchhip, Thenzawl leh E. Lungdar atangin SAPIO leh SPIO te telin RTI District Resource Person leh I&PR Deputy Director K. Saitluanga chuan RTI dan hnuaia Public Authority te tih tur leh SAPIO leh SPIO te mawhphurhna te a zirtir a. District Resource Person Stephen Laltlan-sanga Auhmun, ARDO chuan RTI Online chung-chang zirtir bawkin Lalmuankimi, District Course Co-ordinator chuan Chief Information Commission hnathawh dan chungchang a zirtir bawk a ni.
Mipuite hnena RTI Act pawimawh zia inzirtirna atan hian rampumah ‘RTI Week’ chu hman leh mek a ni a, he hapta pual hian Vawiin chawhnu dar 1:30 hian Serchhip-ah pawh hun hman tur niin Chief Information Commissioner Lalnunmawia Chuaungo chuan a telpui dawn a ni.
Comments
Post a Comment