Mizoram Finance Commission 2-na buatsaihin Sawrkar sum chungchangah Workshop neih a ni

Mizoram Finance Commission 2-na buatsaihin nimin khan Aijal Club-ah ‘Workshop on State Finances, Resource Mobilization for Local Bodies and Terms of Reference of the 2nd Mizoram Finance Commission’ neih a ni.

Sawrkar in sum leh pai a thawhchhuah dinhmun, State Sawrkar sum thawhchhuah atanga tualchhung inrelbawlna - Village Council, Municipal Body leh Autonomous District Council pathum te hnena sum leh pai-a a puih dan leh heng insem dan leh sum an thawhchhuah belh thei dan bakah 2nd Mizoram Finance Commission hnathawhnaa Terms of Reference inhrilhfiahna leh sawizauna hun ah hian Mizoram Finance Commission (MFC) 2-na a Chairman F. Vanlalruata chuan thuhmaruai sawiin State Finance Commission hnathawh dan leh an mawhphurna te a tarlang a. MFC 2-na a Deputy Secretary Lalrohlua chuan Workshop thupui chungchang sawi zauna leh hemi chungchanga thil pawimawh te tarlangin MFC 2-na Member Lalmalsawma chuan sawiho tur atana thu chhawpchhuahte sawi hawngin Workshop a tel te chu an ngaihdan te sawi turin a sawm a ni.

He sawihona hunah hian Chhiah atanga Sawrkar sum thawh-chhuah (State’s Own Tax Revenue) bakah Chhiah nilo State Sawrkar sum thawhchhuah (State’s Own Non Tax Revenue) a sum te chu tualchhuang inrelbawlbna te nen insem theih dan a awm thei em tih te, ADC pathum te hnena sum an chan tur ruahman kawnga tehfung hman mek chungchangte, Mizorama Municipal body 2 te tana sum ruahman leh pek kawnga tehfung hman mek chungchangte, Village Council, Urban Local Bodies leh ADC ten tuna sumhnar an neih bak, sum hnar dang Chhiah emaw, Chhiah nilo emaw atanga sum an thawhchhuah theih dan kawngte bakah State Sawrkar in Chhiah nilo, Non-Tax Revenue atangin sum thawhchhuah belh a nei theih dan kawngte chu huamzau taka sawiho a ni bawk.

He Workshop-a tarlan danin kum 2015-16 ah Chhiah atanga Sawrkar sum thawhchhuah State’s Own Tax Revenue chu cheng vbc. 358.42 a ni a, hei hi kum 2020-21 ah chuan cheng vbc. 647.56 ah pungin chho in hemi inkarah a pun dan chu chawhrualin kumtin za zela 12.56 in a pung ang a ni a. State’s Own Tax Revenue-ah sum lut tam ber chu State Goods & Services Tax niin hei hi tun kum hnih kalta khan za zela 70 bawr vel a ni. Kum 2015-16 khan Chhiah nilo atanga Sawrkar sum thawhchhuah (State’s Own Non Tax Revenue) chu cheng vbc. 297.63 a ni a, hei hi kum 2020-21 ah chuan cheng vbc. 561.76 ah pung chho in hemi inkarah a pun dan chu chawhrualin kumtin za zela 13.55 ang a ni.