Mizoram-a Damdawi enfiahna tur hmunpui hawn a ni

Sawrkar laipui atanga sum hmuh cheng vbc. 480 atanga State Drugs Testing Laboratory building sak tharMINECO a mi chu nimin khan Health Minister Dr. R. Lalthangliana chuan a hawng.

Health Minister Dr. R. Lalthangliana chuan damdawi enfiahna leh zirchiana tur State Drugs Testing Laboratory changtlung tak hawn a ni ta chu lawmawm a tih thu sawiin, Mizoram mipui ten tangkai taka an hman ngei a beisei thu a sawi. Health Minister chuan COVID hripuiin Mizoram a tihbuai avangin Health Department hnuaia post 734 hnawhkhah tur, Mizoram Sawrkarin phalna a pek vek tawh, a hlawhtling thei ta lo chu pawi a tih thu sawiin, chutihrual erawh chuan he hripui leng avang hian kawng dangah malsawmna tam tak Health Department in a dawng thung a ni, a ti. Hripui leng karah SRHF-ZMC ah ICU khum 13 atangin sawmnga dawnah tihpun a ni a, Ward dangah khum 150 bawr vel awm thin kha 400 bawrah a chho a, building chung ber siam mek niin chumi peihfel a nih hunah phei chuan khum 500 a kai dawn niin Minister chuan a sawi. ZMC-ah vek hian Genome Sequencing Laboratory hawn a nih thu te, Boys leh Girls Hostel sak zawh niin building thar dang sak mek a nih thu leh ZMC leh Aizawl Civil Hospital-a Oxygen Plant te chu tihlen a nih bakah District tinah Oxygen Plant dah a nih thu te pawh a sawi bawk a ni.

Sawrkar Laipui Centrally Sponsored Scheme (CSS) chi khat Strengthening of Drugs Regulatory System hnuaiah State Drugs Testing Laboratory sakna atan hian cheng vbc. 480 hmuh a ni a. Hei hian builiding sakna senso te, he Laboratory in bungrua leh khawl thil chi hrang hrang a mamawh leina tur leh thawktu kum 3 chhung atana rawihna tur a tel a. A building sak hna hi December 2, 2019 khan bultan niin November 19, 2021-ah sak zawh a ni a, sum senso hi cheng nuai 245.16 a ni. He Laboratory a khawl pawimawh awm te bun (install) tu tur hi phailam atangin an rawn kal dawn a ni.

Health Minister in a hawn tak State Drugs Testing Laboratory building thar hian chhawng hnih a nei a, a chhawng chung zawkah hian Chemical Reageant dahthatna te, hmanraw dahkhawmna te, Sample & Drugs Section te, Chemical Analysis Room te leh Microbiology Section te a awm a. A hnuai zawkah hian Sample Store Room leh Office pui ber dah a ni. State Drugs Testing Laboratory a hman tur khawl changkang leh manto chi 31 dah a ni a. Damdawi (drugs) tha leh tha lo en nan te, a lem leh a tak finfiah nan te, a him leh him loh en nan te, ram dang atanga rawn lut damdawi te a hman ngam em tih enfiahna atan te hman theih a ni dawn a. He Laboratory hi changtlung taka siam leh thuam a nih avangin damdawi endik theih loh a nei lo tura ngaih a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man