Ruihhlo ngai enkawl dam te enkawl chhunzawm dan tur chungchangah inrawnkhawmna neih a ni

Home Minister Lalchamliana hovin nimin khan ruihhlo ngaite enkawlna kawnga hmalatu pawl hrang hrang ten ruihhlo ngai enkawl damte enkawl chhunzawm dan tur chungchangah inrawnkhawmna an nei.

Mizoram Police Hqrs. Arya Mess, Khatla-a he inrawnkhawmna ah hian Home Minister chuan Mizoram in ram dang pahnih, Myanmar leh Bangladesh te ramri thui tak a tawm a, Myanmar leh Bangladesh nena kan inrina lai hian khawvel huapa hriat lar, ruihhlo siam chhuahna leh tawlhna hmunpui ‘The Golden Triangle’ an tih chu a hnaih em em mai a, hei vang hian ruihhlo hi kan hlat ngai lo a ni, a ti a. “Theihtawp chhuaha sawrkar, Kohhran leh Tlawmngai Pawl te kan tangho chung pawh hian do rem a harsa em em a, tunhnaiah phei chuan hun dang zawng aiin kan man hnem a, ruihhlo man pawh a tlawm zawk lehnghal a, hei hian suahsual rawngbawlna chi hrang hrang a tipunlun lehzual ngeiin a rinawm a ni,” a ti a. Hriat chinah ruihhlo an man zinga a lian tham deuh hi chu Mizoram pawn leh International Market-a hralh tur nia a lan thu sawiin, “Chutihrual chuan tualchhunga hralh tur che vel nia lang ringawt pawh hi kan State chhunga mihring cheng zat nen chhut chuan a tam tham hle a ni,” a ti bawk.

Home Minister Lalchamliana chuan sawrkar department hrang hrang Police, Excise & Narcotics, Health & Family Welfare, Social Welfare & Tribal Affairs leh a dangte bakah Kohhran leh tlawmngai pawl te, NGO leh Voluntary Organisation te, mimal thahnemngai ten kan theihna chin chinah hma kan lak thu leh, thahnem pawh kan ngaiin hna pawh kan thawk tam tih sawiin, heti chung hian kan thawh nasat zual deuh deuh chu a la ngai dawn tih a lang reng tih a sawi a, he inrawnkhawmna ah pawh hian ruihhlo ngaite leh helama inhnamhnawih ten sim duha inenkawlna hmun Camping, De-Addiction Centre etc. an pan a, hlawhtling nia in hriaa an chhuahsan hnua ruihhlo an bansan hlen theihna tura awmze neia hmalak dan tur an sawiho dawn nia a hratin lawmawm a tih thu a sawi bawk.

Stakeholders Meeting on Substance Use Problems (Aftercare Services)-ah hian Health & Family Welfare Department, Social Welfare & Tribal Affairs Department, Excise & Narcotics Department, Police, Mizoram Synod, Central YMA, Synod Hospital, Mizoram Journalists Association te bakah Home/De-Addiction Centre hrang hrang aiawhte, mimal mi thahnemngai te an tel a, USA atanga sawm thiamna bik nei Prof. Dace S. Svikis, Virginia Commonwealth University pawh telin kalkhawmte chuan ruihhlo ngaite, inenkawlna hmun atanga an chhuah hnu a ruihhlo an bansan hlen theihna tur atana hmalak ho tha an ti tlang a, ‘Collaboration Structured Strategy for Aftercare’ duan tha tiin hemi atan hian zau zawka inrawnkhawm leh thuai an tum a ni.