Champhai-a MYC Coaching Centre-ah Class la tan

Mizoram Youth Commission (MYC) in Champhai-a MYC Coaching Centre a buatsaih ah nimin khan Class lak bultanna neih niin he hun hi Champhai North bialtu MLA leh Health & Family Welfare Board Vice Chairman Dr. ZR. Thiamsanga chuan a telpui a ni.

MYC Coaching Centre-a Class lak bultanna ah hian Dr. ZR. Thiamsanga chuan Sawrkar hmalakna leh khawtlang tana thahnemngai taka tha thawhtute hmalakna avanga Champhai-ah MYC Coaching Centre a taka kalpui a ni chu lawmawm a tih thu a sawi a. Ramri dep Champhai District a awmte tana rualawhna a phuhruk ngei a beisei thu sawiin, Zirlaite chu Champhai mai bakah Mizoram leh India ram pum anga mi tangkai leh chhawr nahawm nih tum tura ngaihtuahna seng turin a fuih a. Rual elna chang hriaa an tum leh hmabakte tha taka hlen tum turin a chah bawk.

MYC Coaching Centre Champhai hi kumin June ni 17 khan hawn niin hemi hnu hian Faculty lak leh bungraw mamawh angte lei niin nimin atang khan Class lak tan a ni a. Thawktu 5- Coordinator 1, Faculty 3 leh MTS 1 an awm mek a. Class hi zing dar 6:30 atanga dar 8:45 thleng kal tur a ni a, General Studies, Mathematics leh English-te zirtir an ni ang. MYC Coaching Centre Champhai-ah hian a bultan nan seat 30 a awm a, Course khat (1) hi thla thum (3) chhung awh tur a ni a, thla thum Course zawh hian a thara Admission tih zel tur a ni. Zirlaite hi MSSSB, SSC leh MPSC thleng hmachhawn tura puahchah tum an ni a, a bultan nan MSSSB leh SSC course-te kalpui niin, course thar atangin MPSC course kalpui tum a ni. Nimin-a he hun hman hi Champhai District Bawrhsap James Lalrinchhana chuan kaihruaiin hmanraw mamawh te dah belh zel tum a nih thu a sawi bawk.