ICFAI Mizoram Chancellor thar in Governor a kawm

ICFAI University Mizoram-a Chancellor thar Prof. Haragopal Reddy leh a thawhpui Senior Faculty te chuan nimin khan Governor Hari Babu Kambhampati chu Raj Bhavan-ah an kawm.

He inkawmhona ah hian ICFAI Mizoram Chancellor thar Prof. Haragopal Reddy chuan ICFAI Mizoram hmasawnna turin theihtawp chhuah a tum thu a sawi a. ICFAI Mizoram tana hmalakna pawimawh deuh an neih tur te pawh a sawi tel bawk a ni. Governor Hari Babu Kambhampati chuan ICFAI Mizoram hotute nen inkawmna an lo neih tawh thin thu sawiin, ICFAI Mizoram dinhmun te pawh engemaw chen a hriatpui thu a sawi a, theihtawp chhuah zel turin Chancellor thar leh a thawhpuite chu a fuih bawk. ICFAI University lo chu Mizoram-ah Private University dang an awm loh avangin ICFAI mawhphurhna chu a sang hle tih pawh sawiin, ICFAI Mizoram-ah hian thalaiten eizawnna atan leh hnathawh tur hmuhna atana tangkai tur zirna - Skill Development lam, a bikin Healthcare leh Hospitality Sector lam te uar se a duh thu a sawi bawk a ni.

He inkawmna ah hian ICFAI University atangin Vice Chancellor Prof. RP. Vadhera, Vice Chancellor leh Dr. Damodar Reddy, Director, ICFAI University Coordination Department leh Dr. David Lawmzuala, Registrar te pawh an tel a, ICFAI Mizoram hotute hian kumin November thlaah Convocation an neih tur thu sawiin, he hunah hian Governor chu khuallian atan an sawm nghal bawk a ni.