Champhai-ah RTI Week hawnna neih a ni

Nimin khan Champhai-ah Right to Information (RTI) Act, 2005 Week hawnna leh inhrilhhriatna hun hman a ni.

Mizoram Information Commission (MIC), Deputy Commissioner's Office Champhai leh DIPRO Office Champhai te tangkawp buatsaih RTI Week hawnna hun hi MIC Secretary H. Dolianbuaia chuan khuallian nia hmanpuiin RTI Act chu kum 2005-ah Parliament House pahnih ah ni khat chhungin tlai khawmuang hauh lova pass niin President-in a pawmpui nghal a nih thu leh Mizoram-ah pawh kum 2006-ah kalpui a nih thu a sawi a. October 5-12 chhungin India ram pumah RTI Week hmang vek tura tih a nih angin Mizoram-ah pawh remchan dan ang zela hman a nih thu a sawi a ni.

MIC Secretary chuan RTI Act Sec 4 in a phut angin department tinte website tha taka vawnga mipuite hriat tura tulte hrilhhriat kawnga beisei an nih thu sawiin, hemi kawngah hian hma la tha lo department 41 vel koh tawh an nih tawh thu a sawi a. RTI Act hmalakna chu hna penhleh anga ngai lova hna kalphung pangngai, Office hna zinga bet tlat a ni tih hre tur leh RTI zawhna zawttute puih leh mamawh pekchhuah kawngah theihtawp chhuah turin kalkhawm te chu a chah a ni.