Home Minister in e-Forensic System a hawng

Home Minister Lalchamliana chuan nimin khan e-Forensic System chu Directorate of Forensic Science Laboratory Conference Hall, Aizawl-ah a hawng.

E-Forensics System hi Ministry of Home Affairs hnuaia hmalakna pakhat, Inter-operable Criminal Justice System (ICJS) platform a ni a, pawikhawihtute chunga dan anga rorelna a hun taka hlenchhuah a nih theih nan MHA chuan ICJS hi kum 2018 khan a hawng a. He project hnuaiah hian dikna hlenchhuah kawnga mawhphurtu hrang hrang Police, Forensic, Court, Prosecution leh Prison ten anmahni zawn theuha an hmalakna te khaihlak awm lova awlsam taka an inhriatpawh theih nan CCTNS, e-Court, e-Prison, e-Forensics leh e-Prosecution hmang te in a thlunzawm a ni.

E-Forensics System-ah hian FSL atanga Expert Report chhuak zawng zawng chu e-Forensics National Portal-ah dah niin, case thawntu Police Officer chauhin report hi a download theih turin siam a ni a. Tun dinhmunah chuan Mizoram Police leh Commissionerate of Excise & Narcotics hnuaia Officer te hman theih turin E-Forensics hi siam a ni phawt a, Department dang FSL dawr thin te pawhin an hman ve thuai theih turin hmalak zel tum a ni.

Home Minister hian ‘Mizoram FSL Annual Report 2021-2022’ pawh he hunah hian a tlangzarh nghal a, Mizoram FSL hi kum 2015 atang khan Directorate puitlingah hlan kai niin, kum 15 chhung zet 'Zero Case Pendency' an kalpui tawh a, India rama FSL hrang hrang zingah case pending nei ngai 10 awmchhun an ni; FSL hian an hnena case thawn thin te tan kum 2014 atang khan an website-ah 'Online Case Tracking System' an siam a, case dawn anih atanga thawnchhuah anih thlengin case dinhmun diktak a thawntu te tan en theihin an siam bawk.

Heng e-report-te hi Mizoram FSL atanga tihchhuah a ni ngei em tih leh khawih danglam a nih leh nihloh finfiah (authenticate) theih turin Digital Signature hmanga sign vek a ni a, report dawngtu tur Officer-in e-mail leh SMS kaltlanga One Time Password a dawn hmang chauhin e-Forensics portal-ah hian luh theih anih avangin a him hle bawk. Hetiang e-report hi Court pawhin a pawmpui thlap anih avangin hard copy-a hrana thawn ngai tawh lovin, Paperless System hmang thei tura rahbi thar pawimawh tak a ni. Chutih rualin FSL e-report dawngtu tur lam an inpeihfel hma chu a tul angin hard copy thawn tel zel a la ni rih ang. Sawrkar lapui, NCRB in e-report upload tur a tih hnuah May 1, 2022 atangin Digitally Signed e-report hi ICJS ah upload niin, Mizoram FSL hi India ramah Expert Report - Digital Signature hmanga finfiah theih ngei hmang hmasa ber leh paperless FSL hmasa ber an ni.