Congress Party Manifesto pakhatna tlangzarh a ni

Kum 2023 General Election lo awm tura Congress Party Manifesto pakhatna chu nimin khan Aizawl-a Congress Bhavan Golden Hall-ah tlangzarh a ni.

Congress Party Manifesto pakhatna hi MPCC President Lalsawta chuan tlangzarhin, “Kan Manifesto hi tih hlawhtlin theih vek a ni a, tih hlawhtlin theih loh tur engmah Manifesto-ah kan dah lo. Pathian leh mipui zara kan sawrkar theih hlauh chuan hemi hmang hian Mizoram hi ram nuam, him leh ram hausaah siam kan tum a ni,” a ti a. “Ram changkang te'n an neih ang bawk ram kan nei a, a dika kan kaihhruai chuan thunun nuam tak, mipui kan nei bawk a. He hmanrua pahnih hmang tur hian enkawlna (Efficient Management & Dynamic Governance) kan nei ang a, hetianga hlawhtling ram tam tak an awm a ni,” a ti.

Lalsawta chuan Mizoten kan chapona kan kalsan a hun tih thu he hunah hian sawiin, “Service Sector hi Mizo te thiam leh zeina zawng tak a ni a. Kan ram chhungah leh ram dangah kan ?halai te'n hna thawkin ram danga thawkte phei chuan an Remittances (Dollar, Pound, Euro) tam tak a zarah India ramin Foreign Exchange thlengin a pui dawn a ni. A pawimawh ber hial pakhat chu Mizo mipui hian Company emaw, hotute hnuaia thawk thiam turin kan chapona (ego, pride) hi kan kalsan a hun a ni,” tiin Congress Manifesto No. 1 hi a hlawhtlin theih nan Mizoram mipuite tanpuina leh thlawpna a ngen nghal bawk.

Congreess Party Election Manifesto No. 1, ‘Tang Puihna’ Mizoram Economic Development Initiative (MEDI)-ah hian Congress Party-in sawrkarna an siam chuan Mizoram in hmasawnna tluantling leh kai rual tha tak kan neih theih nan an thawk dawn tih an tarlang a, “Mizoram mi tupawh, hmasawn tur leh intodelh tura rinawm tak leh taima taka tan latu apiang chu theihtawpin kan chhawmdawl ang,” an ti.

Kum 2023 MLA inthlanpuiah Pathian leh mipuite zarah Congress Party-in Sawrkarna an siam a nih chuan Mizoram in hmasawnna tluantling kan neih ngei theih nana hma an lakna tur hrang hrang tarlangin, heng zingah hian kan tharchhuah thiar velna tur, a Fur a Thal-a hman theih Feh Kawng (All Weather Road), mipuite mamawh phuhru zo ngei tur a tam thei ang ber an siam tur thu te, Tuilak (Irrigation) rintlak kan neih theih nan theihtawpin hma an lak tur thu te, Thei leh thlai thar hralhna (Agriculture Marketing) hlawhtling tak kan neih theih nan Dahthatna leh sawngbawlna mumal tak din te, hralh dan tur kalphung rintlak siam te, Dan mumal tak hnuaiah thei leh thlai hralhna viltu (Agriculture Marketing Regulatory Body) an siam tur thu leh hemi hnuaiah hian mumal taka a man bithliahtu leh Market dinhmun zirchiangtu leh vilvengtu te an awm tur thu te tarlan a ni.