PCI-in Missionary ngah ber, NGO-ah YMA member tam ber

Mizoram-a Kohhran hrang hrang zingah Presbyterian Church of India-in Missionary an ngah ber a. Tlawmngai pawl zingah Young Mizo Association (YMA)-in member an ngah ber.

Tunhnaia tihchhuah, ‘Mizoram Statistical Abstract 2021’ tarlan danin Mizorama Kohhran hrang hrang 10 zingah Presbyterian Kohhran chuan Missionary tir hnem berin 1,553 an tir a, hei hi Missionary tirh chhuah zawng zawng atanga a zatve deuhthaw, 44.63% a tling a. Kohhran dang ten Missionary an tirhchhuah zat chu BCM 946, UPC (NEI) 219, UPC (MZ) 138, Salvation Army 307, Seventh Day 15, ECM 104, LIKBK 175 leh IKK 22 te an ni a, Kohhran lian zingah Roman Catholic chuan Missionary tirh chhuah an nei lo thung.

Mizoram-a Kohhran hrang hrang zingah Prebyterian Church of India chu member ngah ber a ni bawk a, PCI hian member 626,983 an nei a, hei hi Mizoram Kohhran 10 tarlan atanga chhutin a zatve aia tam 54.66% an tling a ni. Prebyterian Church of India dawtah hian Baptist Church of Mizoram (BCM) chu pahnihna niin member 172,219 an nei a, pathumna UPC (NEI) in member 83944 an nei bawk. Kohhran hnuaia thawktu hrang hrangah pawh PCI hian an nei tam ber a, 5974 an nei mek nia tarlan a ni bawk.

Mizorama tlawmngai pawl (NGO) hrang hrang zingah Young Mizo Association (YMA) chu member ngah ber a ni a, kum 2021 khan member 469,709 an nei a, hei hi NGO hrang hrang member atanga chhutin 50.70% nei ang an ni. Tlawmngai pawl zingah Mizo Hmeichhe Insuihkhawm Pawl (MHIP) chu member nei tam ber dawttu niin 288,565 an nei a, Mizoram Upa Pawl (MUP) chu pathumna niin member 67,848 an nei nia tarlan a ni bawk.