Chief Minister in Upa te ni a hmanpui

Chief Minister Zoramthanga chuan upa ten tawnhriat leh finna an chhar te thalai taksa la chak tha ten hmang tangkai se a duh tih a sawi.

Zemabawk North Area MUP buatsaih Upate Ni lawmna Inrinni a neih a hmanpuina ah Chief Minister Zoramthanga chuan upate hlutzia sawiin, “Bible min hrilh ang in kan pawnlam taksa hi awng rawp telh telh mahsela, kan chhunglam Thlarau erawh chu ni tin simtharin a awm tih hi a dik hle a. Kum upat ang zelin finna leh thlarau nunah kan nghet tulh tulh a, tangkai lo emaw kan in ti mai ang tih ka hlau thin a, kan tangkai telh telh zawk thin a, thangtharte zingah a changkang apiangin upate hlutna an ngaipawimawh thin a ni,”a ti.

Chief Minister chuan upat lamhman thiam a pawimawh tih sawi bawkin, “Ni danga kan tih ang kan ti thei tawh lova, phurrit zawnga hman leh lungngaihnana kan hman chuan Pathian in kum tam min dam tirna lallukhum min pek hi phurritah kan ngai tihna a ni dawn a ni,” tiin “Pathian hnenah tlu lutin kan vanneihna zawk hi kan hmuh len chuan kan nun a hlim ang a, kan hrisel ang a, ram leh hnam, chhungkaw tan mi hlu kan la zawk dawn a ni,” a ti bawk.