Latest News

Bairabi Zophai-ah Assam in Barrack sain nimin khan buaina thleng lovin thiah leh nghal a ni

Assam Police te chuan Pathianni khan Bairabi Zophai-a CH. Chhunga leilet bul ah Mau hmanga Temporary Shelter House (Barrack) an sa a, he thil thleng avanga boruak tha lo zawk thlen mai hlauhthawnawm a nih hnuin Assam Police te hian an Barrack tur sak hi nimin khan thiatin boruak duhawm lo thleng a awm zui lo nia thudawm a ni.

Assam lamin Buk an sakna hmun hi Ch. Chhunga leilet niin a hmuna kal Kolasib SP Vanlalfaka hnenah Katlicherra OC chuan hmalakna thar chu Assam Police ten an hriatpui loh thu leh Guwahati lama awm Commando te training na hmun tur nia a hriat thu alo hrilh a, he hmalakna hi September thla tawp lam khan neih tan tawh a ni a, Assam lam hian Inrinni leh Pathianni khan Temporary Shelter House hi sa in an zo nghal deuh mai nia thudawn a ni.

He buk an sak hi khawtlang hruaituten thiah an tum chu anmahni lo dang tu Police te nen nimin zing dar 4:00 dawn thleng khan an innawr buai a, hemi hnu hian inremna siamin MZP hruaitute chuan nimin chawhnu dar 3:00 thleng khan sawrkar nghakin Sawrkar chetna an hmulo anih chuan hma an lak tur thu an sawi a, nimin chhun khan Temporary Shelter House hi Assam lamin an thiat zui ta a ni.

Nimin khan Kolasib bialtu Minister K.Lalrinliana hovin Bairabi North-a Panchayat Bhavan-ah Joint VC leh Bairabi All NGO Coordination Committee hruaitute chuan thutkhawm an nei a, he hunah hian Minister chuan ramri buaina avanga Mizo thalaiten Assam Police kut an tawrh a rem tih loh thu sawiin, State pahnih inrina hmunah te chuan hmalakna kalpui lo tura inremsiam a nih angin Zophai-a Assam lam hmalakna chungchangah rang takin State pahnih Chief Minister leh Home Minister-te an inbiak nghal thu a sawi a. Zophai-a Mizoram Police Duty-na hmun chu awmhmun rem tak a nih loh avangin fimkhur tak a ngaihtuahna sen a tul thin thu a sawi bawk.

Minister chuan Ram chin hauh a Bairabi khawtlangin theihtawp an chhuah thinna ah leh sawrkar ngenna ngai pawimawh a ramri chung-changa thawhhona tha tak a awm thin avangin lawmthu a sawi a. Ramri a buaina chinfel a nih theih nan Border Committee kaltlangin hmalak mek a nih thu a sawi bawk.

Minister hova thutkhawm neih zawh hnu hian Kolasib SP Vanlalfaka Ralte hovin Kolasib DFO, Bairabi SDC, Kolasib MJA hruaitute, Zirlai Pawl hruaitute, NGO hruaitute leh sawrkar mi leh sa te chu Buk sakna hmun Zophai-ah hian an kal nghal a, Assam sawrkar hmalakna Buk hi thiah a ni vek tawh a, Buk sakna hmanrua te pawh Kawngpui-ah thiarchhuah vek a ni tawh bawk a. Boruak muanawm tak hnuaiah helai hmun atang hian Mizoram atanga kal te leh Assam lam atanga lo kal te chu an in tha then a ni.

Nimin vek khan Bairabi Joint VC leh Bairabi All NGO Coordination Committee chuan Bairabi North VC House-ah Joint Meeting neiin, Assam sawrkar hmalakna a Ch.Chhunga Leilet sir-a Buk sak Chief Minister Zoramthanga leh Home Minister Lalchamliana te hmalakna a thiah a ni ta chu lawmawm an tih thu an sawi a. ‘Bairabi Zophai chhak Baibun tlang-ah Mizoram sawrkar in MAP Camp sa ve ngei rawh se’ tiin Assam nena ramri hrula development hnathawh mek te rang taka tihpuitlin anih theih nan Mizoram sawrkarin hmala rawh se an ti bawk a. Ramri chungchangah Dan leh thupek kengkawhtu Force lamte chu mipui te hma ah a ranglam in che chhuak thin tawh se an ti bawk.

MZP General Hqrs. hruaitute leh ZPM hruaitu thenkhat te pawhin helai hmun hi nimin kan thlengin MZP chuan tun hnuah hetiang thil a thleng leh a nih chuan mipuite chet hmaa, na tak leh a rang thei ang bera chhâng let nghal zel turin Mizoram sawrkar an phut bawk.

Comments

Popular News (Last 30 Days)