Zawhna leh chhanna hlawk zawka hman duh

Nimin-a Mizoram Legislative Assembly Session zawhna leh chhanna hunah zawhna pathum chauh zawh hman a ni a, Home Minister Lalchamliana'n zawhna leh chhanna hun chu hlawk zawka hman a nih theih dan tur member ten an ngaihtuah tlan tha a tih thu a sawi.

Nimin-a Assembly inkhawm ah hian Speaker pawh lo ni tawh Lalchamliana hian, zawhna pakhat ringawt darkar chanve zet sawi a ni chunga an la kham lo mah ni-a lang chu tha lo a tih thu sawiin, zawhna pakhat an chai rei lutuk chu tihtawp a ngai a ni, a ti a. Member ten an zawhna chhuak se a ti vek a, hetiang bawk hian Minister-te pawhin an Department chana zawhna awmte chu felfai taka chhan an duh vek a, member ten thil inkaihnawih lo pui pui an zawh thin avanga hun an khawhral thin chu sim a tha a, Minister te pawhin Debate khaikhawmna ang maia chipchiar lutuk sawi an tum thin pawh a tul loh chen a awm a, member te zawhna kha felfai takin chhang mai se, Chair lam pawhin rorelna an kaihhruai kawngah tlema an khawng deuh thaa a hriat thu leh an zavaia tangruala chutiang lam hawia ngaihtuahna seng turin a member pui leh Minister te chu a ngen a ni.

Opposition Group Leader Lalduhoma pawhin, Senior Minister Lalchamliana thusawi chu a thlawp thu he hunah hian a sawi a, zawhna zawttu leh a chhangtu te pawhin Budget sawihona a an thusawi leh thusawi an khaikhawmna anga mahni intarlan tumna awm thei lakah an fimkhur a ngai tih a sawi a. Member ten thu an sawi luih tlat chuan Chair atang pawhin tih vak ngaihna a awm loh chang a awm avangin Member tin te an fimkhur tul a tih thu a sawi ve bawk.