Mizoram-ah Doctor Post ruak 67 awm mekin ZMC-a MBBS zirlaite chhuah hunah a ziaawm beisei a ni
Health Minister, Dr. R. Lalthangliana'n tunah hian Mizoram-ah Doctor Post ruak 67 a awm mek tih Assembly House a hrilh a, Mizoram-a Doctor indaih lohna zualpui chu ZMC-a MBBS zirlaiten an zirchhuah hunah a ziaawm theih beisei a ni tih a sawi bawk.
Nimin-a Assembly inkhawm zawhna leh chhanna hunah Health Minister Dr. R. Lalthangliana chuan Doctor zingah thi te, pension-a chhuak leh zirna sang zawk zir an awm ve zel avangin tunah hian Mizoram pumah Doctor post ruak 67 zet a awm thu leh Doctor indaih lohna a nasa hle tih a sawi a. Doctor Post ruak hnawhkhah hi chak taka hmalak hleihtheih loh, hmalak tul si a ni tih a sawi. Dr. R. Lalthangliana chuan, Mizoram a Medical College awmchhun ZMC chu kum 2018 August thla ah bultan a ni a, MBBS batch hmasa ber mi 100 bawr in nakum kumtawp-ah an zir zo tawh dawn tih sawiin, ZMC chungchangah hian National Medcial Commission of India nen an indawr reng a, COVID-19 vangin thil tam tak tih theih loh awm a, hriatthiam an ngaih tur thlen reng a ni a, nakum kumtir lamah ZMC hi enfiahna hnuhnung an rawn nei tura beisei a ni a, an paltlang a nih chuan MBBS zirlaite chuan Doctor tha takin an zirchhuak thei dawn a. Chumi hunah chuan tuna Doctor indaih lohna zualpui chu phuhruk theih beisei a ni tih a sawi.
ZMC atanga MBBS zirchhuakte chuan India ram chhungah chuan harsatna an tawh a rin loh thu sawiin Dr. R. Lalthangliana chuan, ram dangah chuan tihdan inanga lo vangin harsatna an tawk palh thei a, ram pawn atanga Doctor zir chhuakten India-a Practice turin Health Ministry-a paltlang ngai an paltlang hmasak thin angin ZMC atanga Doctor zirchhuakte pawhin ram danga hnathawk tur chuan thil engemaw an tih ve a ngaih pawh harsatna dang an tawk lo tura beisei a ni, a ti.
Health Minister hian Health Sub-Centre leh Health Clinic ti changtlung turin hmalak mek a nih thu pawh sawiin, Mizoram-a Health Sub-Centre 275 te chu December 2022 ralhmain Health & Wellness Centre-a hlankai hman vek tum a nih thu a sawi bawk.
Comments
Post a Comment