Serchhip Mat phai-ah kumin hian thlai chi hrang tam zawk tharchhuak tura hmalak a ni

Serchhip-a District Horticulture Office chuan nimin khan Serchhip Zawlpui Phai-a Thlasik thlai chingtute tana intawhkhawmna leh Thlasik thlai chin dan zirhona an buatsaih a, Serchhip Mat Phai-ah hian thlai chi dang tam zawk tharchhuah a nih theih nan kumin hian thlai dang chin belh tum a ni.

Serchhip DHO Conference Hall-a he hun buatsaih ah hian Serchhip District Horticulture Officer R. Lalrintluanga chuan Mizoram-a khaw taima leh hmunhma nei tha Serchhip-ah a awm chu vannei a intih thu a sawi a. Tunah hian Thlasik thlai chin a hun chho dawn thu leh tanlak a hun thu sawiin, kumdang a Thlasik thlai, Zikhlum leh Bawkbawn an chin thin bakah kumin hian Samtawk ching tura ruahmanna an neih thu leh a enchhinna atan mi 20 vel chin tir an tum thu a sawi a, hei bakah hian Changkha leh Maitamtawk te pawh chin chhin tuma ruahmanna an siam thu a sawi a. Sawrkar atanga tanpuina a harsa a nih pawhin thlai chi hmuh a nih theih nana hmalak an tum thu sawiin, Serchhip khua chu Mizoram-a thlai thawnchhuaktu lian ber nih tir tum turin he huna kalkhawm te chu a chah a, chumi atan chuan tuna an thlai chin thin mek bakah thlai chi dang tam zawk chin belh chu an mamawh a nih thu a sawi bawk. Thlasik thlai tharchhuah hralhna chu an kut a ni lo tih sawiin DHO chuan, amaherawh chu theihtawp chhuah an tum thu leh tharchhuah phawt chu a pawimawh thu a sawi a, kuthnathawktute chu Serchhip a an awmchhan a nih thu a sawi bawk.


He intawhkhawmna hun kaihruaitu Serchhip Block Horticulture Officer Hannah Lalrohlui Betlu chuan Thlasik thlai chingtute chu sum leh pai leh thlai chi ah an tanpui thei lo a nih pawhin thlai chin dan phung zirtir leh kaihhruaina lamah chuan theihtawp an chhuah dawn thu a sawi a. Serchhip Agriculture and Horticulture Cooperative Society Chairman PC. Siamliana chuan sawrkar in thlai an chinna kawngah tanpuina pe in hma lak sak lo mah se theihtawp chhuah zel tur an ni tih sawiin, chutiang a ni chunga sawrkar in Thlasik thlai chin dan inzirtirna leh hetianga intawhkhawmna hun an buatsaih chu lawmawm an tih thu a sawi a, hei vang hian tan la lehzual turin he huna kalkhawm te chu a chah bawk. 

Serchhip Mat Phai Zawlpui zau-ah hian Kuthnathawktu mi 200 vel an awm thu he hunah hian tarlan niin, thlai chinga eizawnna atana hmang tak tak chu mi 160 vel an nih thu tarlan a ni bawk a, nikum khan Zikhlum quintal 12,000 vel leh Bawkbawn quintal 8000 vel bakah Bawrhsaiabe quintal 60-70 vel an tharchhuak tih Society hruaitute chuan an sawi a. Nimin-a he hun hmanna ah hian kumin a chin turin Tomato, Zikhlum leh Samtawk chi pawh he hunah hian semchhuah nghal niin Changkha leh Maitamtawk chi pawh a remchan anga la semchhuah tura ruahman a ni.

Comments

Popular News (Last 30 Days)

Serchhip DCSO sawn a ni