Serchhip-ah District Bawrhsap hovin Matru Vandana Saptah hawnna neih a ni

Kum 2018 atanga India rama kalpui Pradhan Mantri Matru Vandana Yojana (PMMVY) hnuaia hman thin Matru Vandana Saptah chu kumin ah pawh hman leh turin nimin khan Serchhip-ah District Bawrhsap Nazuk Kumar IAS chuan a hawng.
Matru Vandana Saptah hawnna puala inkhawm Serchhip DC Meeting Hall-a neih ah hian Bawrhsap Nazuk Kumar chuan Serchhip District-ah PMMVY tha taka kalpui a ni thin chu lawmawm a tih thu sawiin, chutihlaiin tunhnaia Serchhip District-a nausen thi mi 7 lai an awm chu a chhan chhuichhuah a tul thu leh hetianga nausen thihna thleng thin titawp tura hmalak a tul thu a sawi a ni.


He hunah hian PMVVY Serchhip District-a DPC F. Hmingthankimi chuan PMVVY kalphung leh Matru Vandana Saptah hman chhan te sawiin, PMVVY chu January 1, 2017 atanga kalpui niin hemi kum atang hian Serchhip District-ah pawh kalpui a nih thu a sawi a, he hmalakna in a tum ber chu India rama hmeichhiate (Nu) khawtlang leh chhungkuaa an dinhmun hniam lutuk chawikanna leh Nu in a fa hmasa ber a pai leh pawm laia hna thawk lo leh hahdam zawka a lo awm a, naute chu hnute tui a mamawh ang tawk a pek theih nan te, Nu chu a lo chak zawk theih nan te a inenkawina turin pawisafai a tanpuina pek a ni tih a sawi a, hemi atan hian Hmeichhia in fa hmasa ber a paiin tanpuina Rs. 5000/- pek thin an nih thu leh Damdawi In emaw, sawrkar pawmpui nau neihna hmuna nau an nei a nih chuan Janani Suraksha Yojana (JSY) hnuaiah tanpuina Rs. 700/- pek tur a ni tih a sawi a. Tuna Matru Vandana Saptah hman chhunga hmalakna tur hrang hrangte pawh sawiin, he ruahmanna kalpui a nih hnuah Serchhip District in intihsiak buatsaih ah lawmman an la dawn zel thu leh kumin a intihsiakna neih leh turah pawh lawmman dawng leh thei ngei tura thawhpui ah he huna tel te chu a sawm bawk a ni.

Serchhip District-a Matru Vandana Saptah hawnna hun hi Serchhip ICDS Project-a CDPO Caryll Lalpari chuan kaihruaiin Matru Vandana Saptah hi September 1 atanga 7 chhunga hman thin ni mah se kumin ah chuan nimin atanga Sept. 11 thleng hman tur a ni dawn a, he Hapta hman chhung hian hmalakna hrang hrang kalpui tur niin Signature Campaign, Banner leh Poster tar, PMMVY chungchang inzirtirna thuziak sem te, Anganwadi Workers ten In tin tlawha inzirtirna neih te, intihsiakna chi hrang hrang buatsaih leh Rally buatsaih te a tel a ni.

Serchhip District-a PMMVY kalpui anih hnu kum 2017-2018 atanga kum kal mek 2022-2023 chhung hian mi 2892 te hnenah tanpuina pekchhuah ni tawhin tanpuina sum pek tawh hi a vaiin Rs. 129,51,000/- a ni a, an zinga 1767 te hi Serchhip ICDS Project hnuaia mi te niin a bak 1125 te hi East Lungdar ICDS Project hnuaia mi te an ni.

Comments

Popular News (Last 30 Days)

Serchhip DCSO sawn a ni