Aadhaar Card chungchanga i hriattur te

Consumer te i harh ang u -XXXVI :

Aadhaar Card chungchanga i hriattur te

- Laldinpuia,

Secretary 

Serchhip District Consumer Association

Aadhaar hi India khua leh tui a duh apiang te chhinchhiahna numbar digit 12 nei a ni a, India mi nilo pawh Foreigner kum khat chhunga ni 182 India ram-a awm chin te tan he Aadhaar-ah hian enrollment tih theih a ni. He Aadhaar data hi a buaipuitu chu Unique Identification Authority of India (UIDAI) an ni a, he Aaadhaar hi khawvel puma Biometric ID System lian ber ni mek a ni. Tunah hian kum 2020 report a a lan danin India mipui 90.1% te hian Aadhaar an nei tawh a ni (source: Rajya Sabha Unstarred Question No. 2910 of 19.03.2020). Aadhaar hi India khua leh tui chhinchhiahna (identification) a ni lova, India rama awm tih chhinchhiahna (residence) atan erawh hman a ni thung.

Aadhaar chungchangah hian hriattur hrang hrang a awm a, heng zinga a langsar zual te lo tarlang ila –

Baal Aadhaar :

UIDAI chuan India rama cheng naupang kum 5 hnuailam tan Aadhaar hranpa a ruahman a, hei hi a rawng pawl a tihchhuah a ni a, a hmingah ‘Baal Aadhaar’ tih a ni. Baal Aadhaar hi naupang kum 5 hnuailam tana ruahman a ni a, naupang kum 5 hnuai lam, Aadhaar enrollment tiduh apiang te chu Baal Aadhaar hi siamsak \hin an ni. He naupang tana Aadhaar siam tur hian naupang Student ID hi Identity Proof atan hman theih a ni a, an Birth Certificate leh an nu emaw, an pa emaw Aadhaar number a ngai bawk.

Aadhaar Mandatory update :

Aadhaar siamtu UIDAI in an thuchhuaha an tarlan danin Aadhaar Card hi naupang tan vawi hnih update a ngai a, naupang in kum 5 leh kum 15 an tlin hian mandatory update neih ngei ngei tur a ni a, hemi tih loh chuan an aadhaar number a valid tawhlo a, thil hrang hrangah hman dawnin a hman theih loh \hin a ni. Hemi kan hriat \hin loh avangin tunlaiin Mizote zingah pawh harsatna tawk kan awm mek a, Ration lak chungchang ah te, Naupang Scholarship leh Golden Card siam chungchangah te harsatna tawk kan awm \hin a, chuvang chuan nu leh pa ten kan fa te kum 5 leh kum 15 an tlin hian an Aadhaar update tir ngei ngei tur a ni. Aadhaar update tur hian kutzung thla leh mit naute thla lak a ngaih avangin Enrollment Centre-ah mahni ngei kal a tih tur a ni.

Aadhaar Mandatory update na atan hian pawisa cheng khat mah chawi a ngai lo a, a FREE veka tih tur a ni.

Aadhaar number theihnghilh/Card tibo tan :

Aadhaar Card or No. hi tihbo palh theih a ni a, kan Aadhaar number kan tibo palh emaw, a Card kan tibo anih chuan Aadhaar Card/No. neih leh dan hetiang hian kawng hrang hrang a awm.

1) Aadhaar Enrollment Centre-ah kalin kan details sawiin check/siam\hat tir theih a ni.

2) UIDAI Toll Free No. 1947 call in kan demographic details phone hmanga sawiin, Aadhaar no hi neih leh theih a ni.

3) Mahni Aadhaar leh Phone No. in link sa tan UIDAI website a\angin hming leh phone no atangin zawnchhuah theih a ni.

(source: Rajya Sabha unstarred Question no 1198 dated 29.7.2021)

Aadhaar Card original bik a awm em? :

Aadhaar Card hi numbar digit 12 nei a ni a, a original leh duplicate a awm hran chuanglo a. Paper Laminated Aadhaar Card emaw, e-aadhaar card emaw, PVC aadhaar card emaw te hi pawm vek a ni. Tin, Aadhaar card hi a color kher emaw, laminate kher emaw hi a original tihna a ni kher lo.

Dr Ajay Bhushan Pandey, UIDAI CEO ni \hin chuan, “Aadhaar card hi print emaw, download emaw, laminate emaw, black and white a print emaw pawh hi original anga pawm vek a ni,” tih a sawi (source:https://uidai.gov.in/images/news/uidai_warns_against_plastic_ Aadhaar_cards_NbTimes_31012017.pdf). Chuvang chuan Aadhaar card hi a color a kan print theilo anih pawhin black and white a print pawh hi original anga pawm vek a ni.