Latest News

Serchhip-ah Helicopter service lo rei tawh

Mizoram khawpui 23-ah Helicopter Service a awm laiin Serchhip-ah chuan hun engemaw chen Helicopter Service hi a awm tawh lo.
Serchhip-a Helicopter Service chungchanga LENKAWL zawhna chhangin Serchhip DC Office-a thawktute chuan Helicopter Service dan tur kum 2019 vela an siam ah Serchhip hi a tel tawh lo tih sawiin, hei hi a chhan chiang taka an hriat bik mai loh thu leh passenger an tlem avanga tel chhunzawm tawh lo ah an ngaih thu an sawi a. Serchhip leh Aizawl inkara Helicopter Service ah hian puitling pakhat tan chuanman Rs. 3000/- leh naupang tan Rs. 700/- a nih thu sawiin, passenger hi an awm ngai loh vanga Schedule-ah tel lo nia an ngaih thu an sawi a. Hetihrual hian Emergency-a Helicopter hmang erawh an awm thin thu sawiin, hei pawh hi a tam loh thu leh damlohna thil-a hmang an ni tlangpui tih an sawi a, hei bakah hian Helipad-a Helicopter rawn tum te hi Sipai hotu lokal changa hman nia an hriat thu leh hei pawh hi a khat hle tih an sawi bawk.

Mizoram sawrkar GAD Aviation Wing-a thawktute chuan Mizoram khawpui thenkhat ah Helicopter Service a mumal loh thu hi sawiin, Champhai chu passenger tamna ber a nih thu an sawi a, Helicopter chuang tur zingah damlo leh VIP duhsak bik an ni thin tih sawiin, “A hma lama ticket lo la tawh pawh nise damlo phurh ngai an awm emaw, tul bika VIP-te an zin a ngaih chuan kan dah pawimawh thin a ni,” an ti a. Helicopter hire man hi darkar khatah cheng nuai khat a ni a, minute 30 chhung man awm lovin a nghak thei bawk a ni.

Comments

Popular News (Last 30 Days)