Damlo bill bat laiin sawrkar duhsak zawngah Contractor tan sum harsatna a awm ngai lo - MPCC

Mizoram Pradesh Congress Committee (MPCC) chuan, “MNF sawrkarin sawrkar hnathawkte hlawh pek a harsat lai leh damlo bill cheng vaibelchhe tam tak mipui-a an bat laiin an duhsak zawng Contractor-te tan sum harsatna a awm ngai lo a ni,” an ti.

Inrinni kalta-a Aizawl Press Club-a thuthar thehdarhtute an kawmna ah MPCC thupuangtu Dr. Lallianchhunga chuan MNF sawrkar hnuaiah sum leh pai harsatna chuan a vawrtawp a thleng chho mek tih sawiin, Mizoram leiba nasa takin a pung a, sawrkar hnathawkten thla tirah hlawh an la thei tawh lo a. Health Care bill ba ringawt pawh cheng vbc. 77 zet a tling tawh a, Contractor tam berten hun rei tak an hnathawhna bill an la thei tawh lo bawk a ni,” a ti a. Mizoram sum dinhmun chu a chhe tak zet tih sawiin, “Mizoram sum leh pai dinhmun chu ‘siam that mai theih tawh loh khawpa dinhmun chhiaah’ a ding ta a ni. MNF sawrkar pawhin tihngaihna an hre tawh lo a, kil hrang hrangah puk tur an dap ngat ngat reng a, sum awm hmasa apiang leiba rulh nan leh hlawhah a kal zel a ngai a. Hetiang taka dinhmun chhiaah hian Mizoram sawrkar hi a la awm ngai lo a ni,” a ti.

Dr. Lallianchhunga chuan hetiang taka Mizoram sawrkarin sum leh pai lama harsatna a tawh mek lai leh Contractor tam zawkin bill an lak theih loh laiin Chief Minister duhsak zawng Contractor-te chuan bill lak kawngah harsatna an tawk ve ngai lo niin a sawi a. RTI hmanga Treasury Office 9 te chhanna atanga a lan danin Kamlova Chhangte bill pathum a vaiin, cheng vbc. 9 chu an thehluh ni la lain Siaha Treasury atangin release nghal anih bakah bill hrang hrang cheng vbc. 9.92 chu chawlhkar khat chhung lekin Siaha Treasury atanga release vek a ni a. Zoramchhana bill 2 cheng vbc. 8.84 chu bill a thehluh ni la lain Aizawl South Treasury atanga release a ni a, a bill dang 2 cheng vbc. 3.65 pawh ni 3 chhunga release vek a nih bakah Robert Romawia Royte Company NECS bill te, MLN Projects bill te, F. Lalliansanga bill te, Tantia Construction Ltd bill te, a vaiin cheng vbc. 8 chuang pawh bill thehluh ni la lain release vek an ni bawk niin a sawi.

MPCC chuan he document nei tur hian nasa taka beih a nih thu leh State Information Commission-ah an zualko thu te an sawi bawk.