Serchhip-ah Family Oriented SEDP hawn a ni

Cheng sing nga sem hi sawrkar duhthusam a ni lo - Home Minister

Chhungkaw Pual Socio-Economic Development Policy (Family Oriented SEDP) hawnna chu nimin khan Serchhip District-ah neih niin he hun hmanpuitu Home Minister Lalchamliana chuan SEDP sum chhungkaw pakhat tana Rs. 50,000 a sem tur chu MNF sawrkar duhthusam a nih loh thu a sawi.

Serchhip District-a Family Oriented SEDP hawnna hun Serchhip DC Conference Hall-a neih ah hian Home Minister Lalchamliana chuan tun tuma Family Oriented SEDP sem tur chu Rs. 50,000 a ni tih sawiin, mipuite hnena sem dan turah ngaihdan chi hrang awm mah se tuna kalpui ang hian chhungkaw 60,000 te hnenah 1st Instalment-ah Rs. 25,000/- pein 2nd Instalment-ah Rs. 25,000 bawk, a vaia Rs. 50,000/- pe tura tih a ni ta tih a sawi a. Sum sem tur hi Department te hnenah August 23, 2022 khan pekchhuah tawh a ni tih sawiin, Department te hian September leh Octoiber thla chhung hian a dawngtu turte hnenah an sem tur thu leh 2nd Instalment chu kumin December atanga nakum (2023) February 15 chhunga sem leh tura ruahman a nih thu a sawi bawk.

Home Minister chuan tun tuma Rs. 50,000/- sem tur chu a semtu MNF Pu Zoramthanga kaihhruai sawrkar duhthusam a ni lo tih sawiin, “Amaherawh chu kan hriat theuh angin sum leh pai-ah, kan rin lohna lamah Covid avang leh thildang avangin harsatna tam takin min tlakbuak a, chuvang chuan kan duhthusam angin a tam thei lo,” a ti a. Rs. 25,000/- a tum hnih a sem tur chu kan tlin tawk a nih thu pawh sawiin, “Chuvangin Mizoram mipui ten kan tlin tawk a ni tih min lo hriat saka min hriatthiamna hi Vawiin ah ka ngen duh bawk a ni,” a ti a. Sawrkar kum khat chhunga Rs. 50,000/- sem chu a tawpna tur a ni lo tih pawh sawiin, “Kan phak tawk leh theih ang tawkin hei hi kan kalpui zel dawn a ni,” a ti bawk.

Sum tam leh tlem lam aiin kan hman dan a pawimawh thu Home Minister chuan sawiin, tun tuma sum pekchhuah pawh hi a dawngtu ten taihmakna leh tih takzetna nena an kalpui chuan a bak lo la kal zel tura beiseina nen chhungkaw tam tak dinchhuahna tham a awm thu a sawi a. Tanpuina dawngtu tur thlangtute pawh an thlan ten an hlawhtlinpui lo a nih chuan mawh an phur ngam dawn em tih inzawh tham a nih thu a sawi bawk.

SEDP District Level Committee-a Member Secretary leh Serchhip DRDA Project Director Malsawmtluanga kaihhruai he hunah hian District Bawrhsap leh District Level SEDP Committee Chairman Nazuk Kumar IAS pawhin sawrkarin chhungtinte anmahni thiamna leh tuina lama eizawnna an thawh theih nana tanpuina a pe chu a lawmawm hle tih sawiin, hmalam pan theihna hun remchang tha tak a pe tih a sawi a. “A dawngtuten hmasawnpui ngei tumin hma kan la theuh dawn nia,” a ti bawk.

Serchhip District Addl. DC Lalmuansanga Ralte chuan report pein Mizoram-a Assembly Constituency milin SEDP Area hi duan a nih thu leh Serchhip District-ah Assembly bial pathum awmin Bial pakhat ah mi 1500 zelin, an vaiin mi 4500 ten tanpuina hi dawng tura ruahman a nih thu a sawi a. Chekawn khua in an chanpual hnawh-khah loh pakhat neiin hei pawh hi lo enfiaha hnawhkhat leh tura an in hriattir tawh thu a sawi a. SEDP buaipuina atan hian Village Level Committee tan beneficiary pakhat zelah Rs. 300/- hisapa pek tur niin nimin vek khan Bank Account-a lut tura an beisei thu leh hmalak dan enfiahna turin District Level in Rs. 2,50,000/- dawngin a vaiin Serchhip District in Rs. 15,99,700/- a dawn thu a sawi bawk.

Nimin-a he hun hmanna ah hian SEDP Village Level Committee te hnenah Administrative Cost leh Department tina tanpuina dawng tur zing atanga thlanchhuah mi pahnih theuh te hnenah Token Cheque chu hlan nghal a ni bawk.