Mizoram Fire and Emergency Services kum 50 tlin lawmna Home Minister hovin nei

Fire and Emergency Services kum 50 tlin lawmna chu nimin khan F&ES Headquarters, Hunthar Veng Aizawl-ah neih a ni a, Home Minister Lalchamliana chuan a hmanpui a ni.

Fire and Emergency Services kum 50 tlin lawmna ah hian Home Minister chuan F&ES chu Department lian tak a ni lo chungin ram, In leh lo leh thil hlu kangral tur tam tak an lo chhanhim tawh tih sawiin, indaih lo tak chunga kan ram leh mipuite himna tura theihtawp an chhuah chu fakawm a tih thu a sawi a. Fire & Emergency Services hian Fire Safety & Prevention chungchangah nasa taka hma lain kumin ah ringawt pawh Office/Govt. building 24, Heritage Building pawimawh 21, Institution 6, Hospital/Nursing Home 21 leh building lian engemaw zat, a vaiin building 79 laiah Fire Safety Audit neih a nih tawh tih a sawi a. He Department thuam chak tur hian hmalak a nih thu leh Ministry of Home Affairs hnenah District hrang hranga Fire Station building sakna tur leh tihchangtlunna tur Project Proposal Expanding/Strengthening & Modernization of Fire Service of the State of Mizoram under the 15th Finance Commission Grant-in-Aid for the year 2020 - 2025, cheng nuai 4725 hu thehluh a nih tawh thu a sawi bawk.

Home Commissioner H. Lalengmawia pawhin F&ES mi leh sa te chu mipuite entawntlaka rinawm taka hnathawk turin he hunah hian a chah a, Mizoram DGP Devesh Chandra Srivastava pawhin mipuiin kangmei laka invenna leh kangmei a lo chhuah palha chetlak dan tur an hriat theih nan Mock Drill neih fo te, tunlai thiamna hman tangkai te, khawpui chhung kawng a tet avanga motor lian aia motor te lam hman tangkai dan zir a tul zia te he hunah hian a sawi bawk.

F&ES hi Mizoram-ah kum 1972 khan din a ni a, tunah hian Fire Station 14 awmin thawktu mi 183 an awm mek a, District 8-ah Fire Station dah niin, District thar 3-ah te pawh Fire Station hawng turin hma lak mek a ni a. Vairengte leh Tlabungah Fire Station a awm bawk. Fire incident/report hi 2019 khan 192, kum 2020-ah 214, kum 2021-ah 318 awmin kumin hian July thla thleng khan 105 a awm tawh a. Kangmei chhuah rikrum thilah 101-ah Fire Department biak theih a ni a, ERSS hmangin 112 hmanga report theih reng a ni bawk.