Khumtung khuaa In rawktu nia hriat Police ten an man

Serchhip District chhung Khumtung khuaa chenna In pathum rawka pawisafai rutu nia hriat Lalremruata, Lower Chanmari, Serchhip nia insawi chu Serchhip Police ten manin nimin khan Serchhip District Court-ah hruai a ni.
Thudawn danin niminpiah zing khan Khumtung khuaa Lalpianthanga te In-ah In neitute awmloh laiin Lalremruata hi lutin an mut pindan-a Kohhran Thawhlawm dahna Thingrem chu Chaicheh hmanga karchhia in a chhunga pawisa ip awm chu an kawmthlang lam tukverh ah a paihchhuak a, In atanga a chhuak tur hi In neitupa hian hmuin thil awmzia a zawhfiah hnuah Lalremruata hi a kal leh mai a, In neitu hian an In a enfiah hnuah thil diklo a awm avangin midang punin Lalremruata hi zawn nghal a ni.

Lalremruata hi Khumtung khawchhunga Aizawl panna kawngpui ah a kal nia hriat niin Motor lo kal pakhat chu a lo phar a, amah zawngtute motor lo niin hemi hnu hian tlanchhe lehin kawng-thlang ah a lum a, hei hi khawtlang mipuite hian manin Serchhip Police te an hriattir hnuah Police te hian an va la a, nizan hmasa khan Serchhip rawn thlenpui niin Police ten thu an zawhfiah hnuah thubuai siam sakin nimin khan Serchhip District Court-ah hruai a ni.

Lalremruata’n pawisa ip a paihchhuah hi Sunday School pawisa dahna niin Rs. 94,991/- awmin hmuhlet vek a ni a, niminpiah zing vek khan Khumtung-a In pahnih pawh rawkin pawisa leh Mobile Phone a la nia thudawn a ni bawk.

Police ten thu an zawhfiahna ah Lal-remruata hi kar hmasa lawka Serchhip Bazar Hnuai-a chenna In pakhat atanga Rs. 55,000/- leh Mobile Phone latu nia hriat a ni bawk a, hemi chungchang ah hian thubuai ziahluh a lo ni tawh bawk a, Case pahnih a awrh ta a ni. Serchhip Police te chuan tunlai hian rukruk kaihhnawih buaina a tam nia sawiin, mipuite chu fimkhur turin an chah bawk a ni.