PM KUSUM-a harsatna thlen

New Delhi-a cham mek Irrigation and Water Resources changtu Minister C. Lalrinsanga chuan niminpiah tlai khan Union Power and Renewable Energy Minister RK. Singh chu a Pisa-ah hmuin PM KUSUM kalpui dan chungchanga Mizoram mamawh leh harsatnate a thlen.

PM KUSUM hnuaia Solar Water Pump vendor tura Sawrkar laipuiin a thlan ten Benchmark cost a hniam ti a hna an tan duh loh avanga Mizoram loneituten harsatna an tawh mek chu a rang thei ang bera sutkian a tul thu Irrigation Minister C. Lalrinsanga chuan Union Minister hnenah hian thlenin, Mizoram leh North East State thenkhat te tan rate tha zawk siam a nih loh chuan vendor tha hmuh zawh loh mai a hlauhawm thu a hrilh a. Khawchhak ram dang depa awm Mizoram State tana Sawrkar laipui hnathawh that dan chu thenawm ram te laka India ram hmel lanchhuah dan pawimawh tak a ni tiin Union Minister chu a rang thei ang bera Mizoram loneitute harsatna hi sukiang turin a ngen a ni.

Union Minister chuan PM KUSUM hnuaia Solar Water pump atana rate an lo duan tawh chu Mizoram leh Northeast state dangte tan siamthat a nih tur thu Minister hi lo hrilhin, a rate awmsaa Tender chhang a, hna pawh hmu tawhtu Vendor thawk tha leh duh si lo chu blacklist an ni ang, a ti bawk.

PM KUSUM hnuaiah hian Loneitute tan Solar Water pump ruahman niin State engemaw zatah chuan Sawrkar laipuiin a thlan vendor ten installation hna thawkin hma an la tawh a. Mizoram tan pawh Sawrkar laipuiin vendor thlangin Mizoram loneitute tan supply leh installation an tih a hun hle tawh laiin Sawrkar laipuiin rate a siam (Benchmark cost) chu Mizoram leh tlangram State thenkhat, transportation leh thil dang harsat bikna state atan chuan a hniam tiin an tih tur an rawn ti duh ta lo a ni.

Comments

Popular posts from this blog

Volleyball S/F khel dawn