Mizorram-a NHM hmalakna Governor in a sawipui

Governor Hari Babu Kambhampati chuan nimin khan Mizoram State National Health Mission (NHM) leh State Tuberculosis Cell a hotute Raj Bhavan-ah kawmin NHM hnuaia Programme lian deuh te leh a bikin TB umbona tura hmalakna chungchang te a sawipui a. Heng hmalakna huanga a ngaih pawimawh dang te a sawipui bawk.

He inkawmna ah hian Governor Hari Babu Kambhampati chuan NHM hnuaia hmalakna programme zawng zawng te nung takin kalpui mek a ni chu lawmawm a tih thu a sawi a. He hmalakna huanga Mit leh Beng enkawlna chungchang ah naupang kum 5 hnuailam te uluk zawka enfiah theih dan awm se a duh thu a sawi. TB umbo na tura hmalaknaah Khawpui pawnlam, District hrang hranga Primary Health Centre (PHC) te thawmthat leh damdawi In tenau zawka Chil leh Khak endikna siam belh tul a tih thu a sawi a. TB natna chu muangchanga enkawl ngai, damdawi te pawh a hun chat chata ei ngai a nih avangin TB natna veitute inenkawlna uluk zawka vil turin State TB Cell a hotute chu a chah a ni.

TB enkawlna damdawi In in tha taka hna a thawh theih nan TB vei enkawlna la mek ten ei leh in tur tha an mamawh a. TB vei inenkawl mek zingah khawsak harsa tam tak an awm avangin mi inphal, TB vei ten an  ei leh in, chaw tha thawhsak thei tan sawmna a siam a. A bultan nan Governor chuan TB vei inenkawl mek zinga mi 20 tan thlatina chaw hrisel leina tur - Nutritional Support a tum sak dawn tih a sawi a. Midang te pawh he rawngbawlna huangah hian rawn tel turin a sawm nghal a ni. 

Nimin-a Governor leh NHM Official te inkawmnaah hian Dr, Vanlalfela, STO, State TB Cell in Doctor rual te hovin Dr. Vanzarliana, TB Cell in National TB Elimination Programme (NTEP) hnuaia Mizoram sawrkar hmalakna a sawifiah a. Dr. Mary Zohmingliani’n NHM hnuaia hmalakna hlawm lian deuh deuh chungchangah report tawi a pe bawk a ni.