HDFC Bank in CSR kaltlanga Civil Hospital Aizawl tana bungrua an pek hawnna neih a ni

HDFC Bank-in Corporate Social Responsibility (CSR) Prog-ramme ‘Parivartan’ kaltlanga Civil Hospital Aizawl-a an hlan ICU khum 10 leh hemi in a ken tel hmanraw chi hrang hrang cheng nuai 70 chuang hu chu nimin khan Health Minister Dr. R. Lalthangliana chuan a hawng.

Hemi puala inkhawm Doctors’ Seminar Room, Civil Hospital, Aizawl-a neih ah Health Minister Dr. R. Lalthangliana chuan HDFC Bank in Civil Hospital, Aizawl-a ICU khum 10 leh mamawh dang hmanraw pawimawh tak tak an pe chu thil chhinchhiahtlak a nih thu sawiin, Mizoram sawrkar leh Zoram mipuite aiawhin lawmthu a sawi a. Tunhnaiah Lunglei Civil Hospital leh Siaha District Hospital tan Motorised ICU khum panga (5) leh hmaraw pawimawh engemawzat an hlan tawh tih a sawi a, Mizoram tana thahnem an ngaihna a ropui tih sawiin, a theih a nih chuan District danga Hospital te tihchangtlunna tura hmalak dan kawng ngaihtuahsak leh turin a ngen a ni.

Civil Hospital Aizawl-a Medical Superintendent Dr. Zoramthanga kaihhruai he hunah hian Health & Family Welfare Board Vice Chairman Dr. ZR. Thiamsanga MLA pawhin  HDFC Bank kaltlanga malsawmna kan dawng thin chu a lawmawm takzet tih sawiin, tun tum mai bakah hian COVID-19 hripui leng dona kawngah nasa takin HDFC CSR kaltlangin tanpuina kan dawng tawh tih a sawi a, Civil Hospital, Blood Bank pawh vawi duai lo tanpuina an lo pe tawh thin tih sawiin, HDFC Bank chu hmasawn zel turin duhsakna a hlan a. HDFC Bank aiawhin Rajnis Sarda, RBB, Cluster Head leh Muskaan Singh, National Head, Govt. & Instn. te pawhin thu an sawi bawk a ni.

HDFC Bank in nimin-a Civil Hospital, Aizawl-a an thil hlan hi ICU khum 10 bakah a ken tel Ventilator, Oxygen Cylinder, ECG khawl, Infusion Pump leh thil dang dang, a vaiin khum pakhat tan hmanraw chi hrang hrang 17 theuh a ni.

HDFC Bank hian CSR Programme ‘Parivartan’ kaltlang hian ICU khum 10 tuna an pek bakah hian June ni 16, 2022 khan Lunglei Civil Hospital leh Siaha District Hospital tan Motorised ICU Bed 5, Multi Para Monitor 5, Suction Machine 5, BiPAP Machine 5, CPAP Machine 5, Ventilator 2 bakah Median Transport Ventilator 3 ve ve an lo hlan tawh a. COVID-19 hripui dona atan kum 2020 khan Rs. 13,75,000/- hu hmanraw chi hrang hrang Mizoram sawrkar hnenah an hlan tawh bawk a, Civil Hospital, Aizawl Blood Bank tan thisen pekna hmanraw chi hrang hrang bakah thisen petute eitur chi hrang hrang an hlan reng thin bawk a ni.