Mizoram PWD ten kawngpui sial hna an thawh ah Leivung paihna tur hmun ruat bik a ni lo

Chief Minister Zoramthanga'n Mizoram chhunga kawngpui sial hna thawh mek Mizoram PWD in a kalpui ah leivung paihna tur hmun ruat bik a ni lo tih sawiin, Contractor leh ram neitute inbiakremna atangin leivung paihna tur ruahmanna siam thin a ni tih a sawi.

Assembly thutkhawm nimin-a neih ah Aizawl West-III bialtu MLA VL. Zaithanzama'n Mizoram chhunga kawngpui sial meka leivung paihna hmun tura ruat ni lova piah a awm leh awm loh a zawhna leh zawhbelhna dangte a chhanna ah PWD changtu Chief Minister Zoramthanga chuan tunhma atangin Mizorama kawng laih reng rengah hmun remchang lai apiangah leivung paih mai thin a nih thu leh a paihna hmun hranpa siam a ni ngai lo tih a sawi a. Hei hi khawvel changkang mek karah inthlak hret hretin World Bank kawng leh ADB Loan pek hmanga kawng laih a nih atang khan leivung paihna chu Environment tichhe lo zawnga ti tura hriattir tan an ni a, Mizoram PWD enkawlna hnuaia hnathawhah chuan a theih ang angin Contractor leh ram neituten a paihna tur remchang zawngin hma an la ve thin a, hetihrual hian Mizoram chu awihpang-a awm a nih avangin ruahsur karah a tira thaa hriatte a lo tha leh lo a, hetiang hi ni mahse, Environment ngaihpawimawh tak chunga hmalak zui a ni tih a sawi. 

Chief Minister chuan, leivung paih chungchang hi PWD lamin an ngaih pawimawh ang bawkin, NGO leh mipui lam pawhin an ngai pawimawh zual zel avangin fimkhur pawh an fimkhur hle tih a sawi a, PWD pawhin a ngaihtuahtu tur Board siamin, a hmunah te an kal chilh a, hetihrual hian State PWD hnuaia hnathawh chu liantham lutuk lo a nih avangin harsatna an tawk lutuk lo a. NHIDCL hmalakna hnuaia hnathawh chu a pui tham ber niin, leivung an paihin Environment a tichhia ni-a sawi chungchang ah nawr pawh an nawr nasa a, leivung paihin ram a tichhiatte chu zangnadawmna hram turin an nawr a, an ni pawhin an tih theih chin chin ti turin hma an la tih a sawi.

State PWD emaw NHIDCL emaw hnuaia kawnglaih reng rengah leivung paihna tur remchang en thin a nih tur thu PWD changtu Chief Minister chuan sawiin, Mizoram Sawrkar hnuaia Contractor an ni emaw, NHIDCL hnuaia Contractor an ni emaw theihtawpin hma an la dawn a, dan lo-a thil ti an awm a nih chuan an hotute hnenah thlen zel a ni ang a, a tul ang zela compensate pawh ti thei turin nawr zel a ni dawn tih a sawi bawk.