Serchhip District-a SEDP hnuaia Sangha khawi turte ‘Beneficiaries Register’ ah ziahluh an ni

Serchhip-a Fisheries Department chuan an Department hnuaia ‘Family Orinted SEDP’ atanga tanpuina dawng turte chu nimin khan kokhawmin ‘Beneficiaries Register’ ah an hming an ziah tir a, Sangha khawi dan zirtirna an pe nghal bawk.
Mizoram sawrkar in ‘Family Orinted SEDP’ kalpui dan tur a ruahman ah tanpuina dawng turte hi an Bank Account-a pawisa thun a nih hmain Department te chuan khua leh Veng tina beneficiaries zawng zawngte chu Form 5 hmangin ‘Beneficiaries Register’ ah an hming an ziah tir tur a ni a, hemi ang hian Serchhip-a Fisheries Department chuan Serchhip District chhung Assembly bial pathum atanga beneficiaries an neih mi 111 te chu nimin khan New Serchhip YMA Hall-ah kokhawmin ‘Beneficiaries Register’ ah an hming an ziahtir bakah intiamkamna ziahtir an ni a, hemi rual hian SEDP hnuaia hmalakna a hlawhtlin theihna turin heng beneficiaries te tan hian Sangha khawi dan zirhona an buatsaih nghal bawk a ni.

He hun hi Serchhip District Fisheries Development Officer (DFDO) Lucy Lalrinpuii chuan kaihruaiin Mizoram sawrkar in mipuite dinchhuahna tura Policy a ruahman SEDP-ah a zarzotu atana thlan te chu an vanneih hle tih sawiin, sawrkar in a ruahman ang ngeia hlawhtlinpui tura theihtawp chhuah turin he huna kalkhawmte chu a chah a. Tuna SEDP an sem tur chu 'Family Oriented SEDP' a ni tih sawiin, chhungkua eizawnna tinzawn a nih thu leh hemi kawngah hian tanpuina dawngtu tur thlangtu Committee te, tanpuina dawngtu leh Sawrkar Department in mawhphurhna an neih thu a sawi a, Department in an mawhphurhna anga hetiang hun hi buatsaih an nih thu a sawi bawk. Serchhip DFDO chuan sawrkar in mipuite eizawnna bultanna atan ruahmanna tha tak tak a lo siam tawh thin thu sawiin, sawrkar chuan a tih tur ti in tanpuina te a lo pek tawh thin thu leh a dawngtute pawhin kan tihtur hlen turin theihtawp kan chhuah ve zel a tul thu a sawi bawk.

Nimin-a he hun hmanna ah hian Fisheries Department-a AFO Lalropara Khiangte chuan Family Oriented SEDP hnuaia tanpuina dawngtute tana hnathawh dan tur leh Sangha Dil siam leh enkawl dan chungchanga ah kalkhawmte zirtirna a pe a, kalkhawmte atangin zawhna leh chhanna hun hmangin Thenzawl Circle- AFO C. Lalhminghlua pawhin lawmthu a sawi bawk.

Fisheries Department-ah hian SEDP hnuaiah Sangha khawi thlan theih niin Serchhip District-ah mi 111 ten an thlang a, Serchhip Bial-ah mi 50, Tuikum Bial-ah mi 30 leh Hrangturzo bial-ah mi 31 te an ni.